د پاکستان پولیس وایي، د هغه زمري مالکان یې نیولي چې په لاهور کې یې یوه ښځه او دوه ماشومان ټپیان کړي ول.
پولیسو د جولای پر شپږمه وویل، له یوې کروندې تښېدلي زمري، یوه ښځه او د هغې پینځه کلن او اووه کلن ماشومان ژوبل کړي دي.
پر ټولنیزو شبکو په استوګنیزه سیمه کې پر هغې کورنۍ د زمري د برید ویډیو هم خپره شوې ده.
د پولیسو په خبره، د زمري مالکانو د حملې د مخنیوي هڅه نه ده کړې.
روغتیايي چارواکي وايي، د ژوبلو کسانو وضعیت ښه دی.
چارواکو هغه زمری وروسته ژوبڼ ته لېږدولی دی.
د پاکستان د وفاقي او صوبايي قوانینو له مخې خلک وحشي ژوي په کورونو کې نه شي ساتلای خو پر دې سربېره ځینې خلک زمري او پړانګان ساتي.
