پولیس وايي د خیبر پښتونخوا په مانسهره ضلع کې یوه ښځه او د هغې ماشومه لور د ناموس په نوم وژل شوي دي.
د مانسهرې د صدر تاڼې یو پولیس چارواکي د اپرېل پر پينځمه د نوم نه خپرولو په شرط مشال راډيو ته وویل چې دغه پېښه د مارچ پر څلورمه د هغې ضلعې په جابه کلي کې شوې چې پکې یوه مېرمن او د هغې د ۱۶ میاشتو لور په ډزو وژل شوي دي.
په لومړني تحقیقاتي رپورټ (اېف ای ار) کې ویل شوي چې وژل شوې مېرمن رابعه نومېږي چې ۲۲ کاله عمر يې درلود او شاوخوا درې نیم کاله وړاندې یې د محمد یاسر په نوم له يو سړي سره د کورنۍ د رضا پرته په خپله خوښه واده کړی وو.
پولیس وايي د وژل شوې مېرمن خواښې ورته ویلي چې د مهتاب شاه په نوم یو تن له درو نورو ناپېژندليو کسانو سره کور ته ورغلی او د هغې پر اينګور (نږور) او لمسۍ يې ډزې وکړې.
پولیس زياتوي تورن کس د وژل شوې ښځې د کورنۍ غړی دی خو نور وضاحت یې ورنه کړ چې د هغې څه کېږي.
پولیس وايي د پېښې په تړاو تر اوسه څوک نه دي نیول شوي او د ملزمانو لټون روان دی.
په خیبر پښتونخوا کې تر دې مخکې هم يوشمېر ښځې د غيرت په نوم وژل شوي دي.
د پایښت لرونکي ټولنیز پرمختګ سازمان په نوم د ښځو او ماشومانو د حقونو لپاره کارکوونکي غير سرکاري تنظيم د روان ۲۰۲۵ز کال د فبرورۍ پر ۲۸مه په خپور کړي راپور کې ویلي دي چې په ۲۰۲۴ز کال کې په پاکستان کې پر ښځو د تشدد ۳۲،۶۱۷ پېښې رپورټ شوي دي.
په هغه راپور کې ویل شوي چې په ۲۰۲۴ز کال کې په ټول هیواد کې ۵۴۷ ښځې د غيرت په نوم وژل شوي دي. بلخوا په خيبر پښتونخوا کې په ۲۰۲۴ز کال کې ۱۳۴ ښځې د غيرت په نوم وژل شوي دي.
په پاکستان د ښځو پر وړاندې د تاوتریخوالي د مخنیوي او خوندیتوب لپاره قوانین شته چې پکې پر ښځو د تېزاب اچونې، کورني تاوتریخوالي، ځورونو او د ناموسي وژنو په څېر جرمونو لپاره سختې سزاګانې بیان شوې دي، خو د بشري حقونو فعالان وايي چې پر دې قوانينو عمل نه کېږي.
د ۲۰۲۵ز کال د مارچ پر اتمه هم د ښځو د نړیوالې ورځې په مناسبت د پاکستان په سېنېټ کې په وړاندې کړل شوي يو قرارداد کې غوښتنه شوې وه چې حکومت دې د ناموسي وژنو د مخنیوي لپاره اقدامات وکړي او ښځو ته دې د ژوند په ټولو برخو کې د سړو برابر حقونه ورکړي.
