د طالبانو د حکومت ویاند هغه راپورونه رد کړي دي چې وايي، هغوی یوازې د امریکا په مشرۍ د نړیوالو ځواکونو پر وړاندې د جنګېدونکو کسانو کورنیو او معلولینو ته پیسې ورکوي.
ذبیح الله مجاهد د اپرېل دویمې پر ماخوستن پر اېکس (پخواني ټوېټر) د سپیناوي بیان خپور کړی چې پکې راغلي، په پیسو ترلاسه کوونکو کې د پرځول شوي جمهوري نظام د سرتېرو کورنۍ هم شاملې دي.
مجاهد لیکلي دي چې په ټول هېواد کې "۶۵۳،۲۶۵ یتیمان، کونډې او معلولین" دي چې ورڅخه یې "۱۶۷،۶۴۵" تنه د طالبانو په لیکو کې د جنګېدونکو کسانو د کورنیو "یتیمان، کونډې او معلولین"، "۱۲۲،۲۹۹" د پخوانۍ جمهوري "ادارې د عسکرو او پولیسو" او "۳۶۳،۳۲۱" عام او "طبعي یتیمان، کونډې او معلولین" دي.
نوموړي زیاته کړې ده چې د طالبانو حکومت تېر کال له هغو "ټولو" سره د مرستې لپاره ۱۲.۵ مېلیارده (اربه) افغانۍ بېلې کړې وې او پکې یې وېشلې وې.
دا په داسې حال کې ده چې یوشمېر رسنیو د اپرېل پر دویمه د مجاهد په حواله ویلي ول چې د طالبانو حکومت "د هغو کسانو کورنیو ته ځانګړی پام کوي چې د امریکا پرضد په جګړه کې یې" ورسره "مرسته کړې" وه.
په ۲۰۲۱ز کال کې پر افغانستان د طالبانو له واکمنېدو راهیسې یوشمېر حکومتي مامورانو په بیا بیا ګیله کړې ده چې تنخاګانې یې ځنډېږي او متقاعد یا رېټایر شوي کسان وايي چې د طالبانو حکومت ورته د تقاعد یا پېنشن پیسې نه ورکوي.
