د نیو زیلینډ د کرکټ ملي لوبډلې په دویمه یو ورځنۍ سیالۍ کې پاکستان ته په ۸۴ منډو په ماتې ورکولو ورڅخه لوبلړۍ ګټلې ده.
د اپرېل پر دویمه د هیمېلټن په لوبغالي کې د سیالۍ پچه پاکستان وګټله او لومړی یې توپ اچونه (بالېنګ) غوره کړه.
د کوربه نیو زیلینډ بیټرانو په ټاکلیو ۵۰ اوورونو کې د اتو لوبغاړو په زیان ۲۹۲ منډې وکړې. مېچل هېس ۹۹ منډې وکړې او ناسوځېدلی پاتې شو. له هغه پرته محمد عباس ۴۱ او نېک کیلي ۳۱ منډې وکړې.
د پاکستان سفیان مقیم او محمد وسیم جونییر دوه، دوه او فهیم اشرف، عاکف جاوېد او حارث رووف یوه وېکټه واخیسته.
په ځواب کې د پاکستان لوبډلې ښه توپوهنه (بیټېنګ) و نه کړای شوه او تر ۱۲م اوور پورې یې پینځه بیټران وسوځېدل. د پاکستان ټول لوبغاړي په ۴۲م اوور کې په ۲۰۸ منډو وسوځېدل. فهیم اشرف ۷۳، نسیم شاه ۵۱ او سفیان مقیم ۱۳ منډې وکړې.
د نیو زیلینډ بېن سییرز پینځه، جیکب ډفي درې او وېل اورورکې او نېتن سمېت یوه، یوه وېکټه واخیسته.
تر دې مخکې کوربه لوبډلې د مارچ پر ۲۸مه په لومړۍ یو ورځنۍ سیالۍ کې هم پاکستان ته په ۷۳ منډو ماتېورکړې وه.
ټاکل شوې چې دواړه لوبډلې د اپرېل پر پینځمه په وروستۍ ۵۰ اووره سیالۍ کې یو بل ته مخامخې شي.
تر یو ورځنیو لوبو مخکې، نیو زيلېنډ د پینځو ۲۰ اووره سیالیو په لوبلړۍ کې هم پاکستان ته په څلور - یو ماتې ورکړې وه.
