د جرمني د بهرنیو چارو وزیرې انالینا بېربوک ویلي دي چې روسی ولسمشر ولادیمیر پوتین سوله نه غواړي او د جګړې د دوام لپاره د وخت ترلاسه کولو هڅه کوي.
نوموړې د اپرېل پر لومړۍ نېټه د اوکراین پلازمېنې کییف ته د سفر پر مهال وویل، باوري ده چې "اوکراین د امریکا تر مشر لاندې د سولې موافقې ته چمتو دی."
بېربوک البته د روسیې پر "نیت د شک" څرګندونه وکړه او و یې ویل، "مسکو د امریکا په مینځګړتوب د سولې په خبرو کې د وخت تېرولو او اخیستو هڅه کوي او واقعاً د جګړې پای ته رسولو هیله نه لري."
نوموړې وویل، پوتین "ظاهراً چمتووالی ښيي" خو په حقیقت کې د "جګړې د دوام له موخې نه شا ته کېږي."
د جرمني د بهرنیو چارو وزیرې له امریکا وغوښتل چې د روسیې "تاکتیکونو ته دې نه تسلیمېږي."
اخوا امریکايي ولسمشر ډانلډ ټرمپ روسیه ګواښلې چې که له اوکراین سره د اوربند له طرحې سره مخالفت وښيي، نو له نویو تعرفو (ټیکسونو) سره به مخامخ شي.
هغه د مارچ پر ۳۰مه له امریکايي اېن بي سي نیوز ټېلېوېژن سره په ټېلېفوني مرکه کې وویل چې په اوکراین کې د انتقالي حکومت جوړولو په اړه د پوتین وړاندیز "ډېر غصه" کړی دی.
هغه وویل، که روسیه یې د سولې د تګلارې پر وړاندې خنډ شي نو د هغه هېواد د تېلو پر صادراتو به له ۲۵ څخه تر ۵۰ سلنه پورې تعرفې یا مالیې ولګوي.
ټرمپ تېر کال د انتخاباتي کیمپېن او سږ کال د خپلې ولسمشرۍ له پیل راهیسې څو ځلې ویلي چې د اوکراین جګړه به ژر پای ته ورسوي.
د مارچ پر ۲۸مه روسي ولسمشر ولادیمیر پوتین وړاندیز وکړ چې اوکراین دې د لنډمهالې نړیوالې ادارې تر واک لاندې راوستل شي چې دا ډول هلته د انتخاباتو ترسره کېدو او ورسره د مهمو تړونونو لاسلیک ته زمینه برابره شي.
ده وویل، د دې ډول موقتي ادارې اوږدمهاله هدف به د جګړې ختمولو لپاره یوې هوکړې ته رسېدل وي.
هلته د روسیې د ولسمشر ویاند دېمېتري پېسکوف د روانې اونۍ په پیل کې وویل چې مسکو له واشنګټن سره د اوکراین سولې لپاره کار کوي.
