د امريکايي ولسمشر ډانلډ ټرمپ تر ګواښ وروسته، د ایران ستر مذهبي مشر ایت الله علي خامنه اي هم واشنګټن ته خبرداری ورکړی دی.
خامنه اي د مارچ پر ۳۱مه، وويل چې که واشنګڼ په خپل کړي ګواښ عمل وکړي، له سخت ګوزار سره به مخامخ شي. هغه زیاته کړه فکر نه کوي چې د ټرمپ ګواښ دې جدي وي خو که په وينا يې داسې څه وشي نو ځواب به ورکړل شي.
تر دې يوه ورځ مخکې د امريکې ولسمشر ډانلډ ټرمپ ويلي وو که ايران د خپل ايټمي پروګرام په اړه د خبرو وړاندیز نه مني نو بمبار به پرې وکړي. هغه له اېن بي سي ټيليويژن سره په مرکه کې وويل: "که ایران موافقه ونه کړي نو بمبار به شي. داسې بمباري چې مخکې به یې هېڅکله نه وي لیدلې."
هغه غوښتنه وکړه چې نوی تړون باید دا تضمین کړي چې ایران د ايټمي وسلو د ترلاسه کولو اراده نلري.
