د اوکراین جګړې ختمولو لپاره روسي او امریکايي چارواکو د فبرورۍ پر ۱۸ مه په ریاض کې د لوړې کچې یوه غونډه کړې ده.
رویټرز خبري اژانس لیکي چې د سعودي عرب سرښار کې شوې غونډه کې د امریکا د بهرنیو چارو وزیر مارکو روبیو او د هغه روسي سیال سرګي لاوروف ترڅنګ د امریکا د ملي امنیت سلاکار مایک والټز او د بهرنیو چارو لپاره د روسي ولسمشر ولادیمیر پوتین سلاکار یوري اوشاکوف برخه اخیستې ده.
د امریکا د بهرنیو چارو د وزارت ویاند ټېمي بروس په ریاض کې تر غونډې وروسته خبریالانو ته وویل چې دا ناستې د ولسمشر ډانلډ ټرمپ او د هغه د روسي سیال ولادیمیر پوتین د هغه ټېلېفوني خبرو په تسلسل کې شوې چې پکې د اوکراین د جګړې ختمولو په اړه خبرې شوې وې.
بروس زیاته کړه چې ننۍ غونډه په دې لور لومړۍ ګام دی او مقصد یې دا معلومول دي چې د دواړو خواوو ګټې څه دي او ایا د دغو ګټو ترمينځ همغږي راتلی شي او که نه.
سيرګي لاوروف هم وویل چې د غونډې هدف په اوکراین کې د روانې درې کلنې جګړې ختمول او د روسيې او امریکا ترمينځ د اړیکو بیا رغول دي. هغه زیاته کړه چې امکان لري چې د دې غونډې په ترڅ کې د امریکا د ولسمشر ډانلډ ټرمپ له خپل روسي سیال ولادیمیر پوتین سره ملاقات ته لاره جوړه شي.
دا په داسې حال کې ده چې د اوکراین ولسمشر وولودیمیر زېلېنسکي ویلي دوی به د امریکا او روس ترمينځ په کېدونکو خبرو اترو کې برخه وانخلي.
نوموړي د فبرورۍ پر ۱۷مه په ابو ظبهۍ کې خبریالانو ته ویلي چې دوی د اوکراین په اړه داسې هېڅ تړون نه شي منلای چې اوکراین پکې شامل نه وي.
مریکايي ولسمشر ډانلډ ټرمپ تر دې مخکې په بیا بیا ویلي، د روسیې او اوکراین ترمینځ روانه جګړه پای ته رسوي.
نوموړي د فبرورۍ پر ۱۲مه له خپل روسي او اوکرایني سیال سره تر ټېلېفوني خبرو وروسته وویل چې ولسمشر ولادیمیر پوتین ورسره موافقه کړې چې د اوکراین جګړې ختمولو لپاره به یې پلاوي سمدستي خبرې پیل کړي.
ټرمپ زیاته کړه چې د پوتین په څېر زېلېنسکې هم سوله غواړي.
