د واشنګټن لپاره د اسراييلو سفير ويلي چې د هغه د هېواد او حزب الله ترمینځ د جګړې ختمولو لپاره په راتلونکو څو ورځو کې ښايي د ډز بندۍ تړون ته ورسېږي.
امريکا حزب الله ترهګره ډله ګرځولې او اروپايي ټولنې يې پوځي ډله په تور لېسټ کې شامله کړې ده.
مايک هرزوګ د نومبر پر ۲۵مه ڼېټه د اسراييلو پوځي راډيو ته ويلي چې پر ځينو نکتو لا خبرې روانې دي او هرډول تړون به د حکومت رضا ته اړتیا لري.
البته هغه زیاته کړه چې دوی تړون ته نېزدې شوي دي. د دواړو خواوو ترمینځ تاوتریخوالی له تېرو دوو میاشتو راهیسې په بشپړې جګړې اوښتی دی.
حزب الله یوه وسلواله ډله او سیاسي ګوند دی چې د لبنان د جنوب ډېری برخې کنټرولوي او د هېواد په پارلېمان کې هم استازي لري.
