د افغانستان کرکټ ملي لوبډلې د درو یو ورځنیو یا ۵۰ اووره لوبلړۍ په لومړۍ سیالۍ کې بنګلادېش ته په ۹۲ منډو ماتې ورکړه.
د نومبر پر شپږمه د متحده عربي اماراتو د شارجې په لوبغالي کې افغانستان لومړی توپوهنه وکړه او په ۵۰م اوور کې يې د ټولو لوبغاړو په سوځېدو ۲۳۵ منډې وکړې.
که څه هم په لومړي سر کې د افغانستان توپوهونکي ښه و نه ځلېدل خو په مينځ کې لوبډلمشر حشمت الله شاهدي او محمد نبي ښه توپوهنه وکړه او په خپل وار سره يې ۵۲ او ۸۴ منډې وکړې.
د بنګلادېش تسکين احمد او مستفيظ الرحمان د افغانستان څلور، څلور لوبغاړي وسوځول.
بنګلادېش په لومړيو اوورونو کې ښه توپوهنه وکړه خو د د شاوخوا ۱۲۰ منډو تر جوړولو وروسته يې لوبغاړي يو په بل پسې وسوځېدل او په ۳۵م اوور کې يې د ټولو لوبغاړو په زيان يوازې ۱۴۳ منډې وکړې او لوبه يې وبايله.
د افغانستان ځوان توپ اچوونکي الله محمد غضنفر د بنګلادېش شپږ لوبغاړي وسوځول او د لوبې غوره لوبغاړی شو.
د دواړو لوبډلو ترمینځ دویمه سیالي د نومبر پر نهمه او وروستۍ یې د نومبر پر ۱۱مه د شارجې په لوبغالي کې کېږي.
