د نایجېریا په ماجییا سيمه کې د تېلو د یو ټانکر چاودنې له امله د وژل شویو کسانو شمېر تر ۱۴۰ اوښتی دی.
د نایجېریا پولیسو د اکتوبر پر ۱۶مه د وژل شویو شمېر اعلان کړ او زیاته يې کړه چې په پېښه کې د ماشومانو او ښځو په ګډون شاوخوا ۵۰ کسان ټپي شوي هم دي.
د جرمني خبري اژانس (ډي پي اې) د راپور له مخې، د اکتوبر پر ۱۵مه شپې مهال د تېلو د یوه ټانکر تر چپه کېدو وروسته ګڼ خلک هلته ورغلل. د نایجېریا چارواکو ویلي چې د پولیسو خلکو ته خبرداری ورکړ چې د پېښې له ځایه دې لیرې پاتې شي، خو پر دې سربېره هغوی هلته د تېلو وړلو لپاره ورغونډ شول چې چاودنه پرې وشوه.
په سېپټېمبر کې هم د نایجېریا په شمال لویدیځ کې د تېلو د ټانکر او مسافر وړونکي ګاډي ترمینځ په ټکر کې ۵۰ تنه وژل شوي ول.
