د لبنان د روغتیا وزارت ویلي دي چې د اکتوبر پر درېیمه تر نیمې شپې وروسته په بیروت کې پر یو اپارتمان د اسراییلو په هوايي برید کې لږ تر لږه شپږ کسان وژل شوي دي.
دا په داسې حال کې ده چې د نړۍ حکومتونه له هغه هېواده د خپلو وګړو د ایستلو هڅه کوي.
اسراییل په لبنان کې د حزب الله پر وسلوالو د ځمکني برید په لټه کې دی او په عین وخت کې یې په غزې تړانګه کې حملې کړې دي چې پکې د ماشومانو په ګډون لسګونه کسان وژل شوي دي.
حزب الله یو ګوند او وسلواله ډله ده چې د لبنان په پارلېمان کې هم استازي لري. امریکا هغه یوه ترهګره ډله بولي او اروپايي ټولنې یې یوازې پر پوځي څانګې څانګې بندیز لګولی دی.
اخوا د ملګرو ملتونو د امنیت شورا د اکتوبر پر دویمه په منځني ختیځ کې د مخ پر زياتېدونکې شخړې د حل لپاره بیړنۍ غونډه کړې ده.
په همدې حال کې د ایران ملاتړ لرونکې حزب الله ډلې ویلي دي چې وسلوالو یې د لبنان په جنوب کې سرحدي کلي ته له داخلو شویو اسراییلیو پوځیانو سره جګړه کړې ده.
د لبنان پوځ ویلي چې اسراییلي پوځیان د لنډ وخت لپاره د هېواد جنوب ته ورننوتي ول.
د اسرايیلو پوځ ویلي چې د لبنان په جنوبي برخه کې یې اته پوځيان وژل شوي دي.
د اسراییلي پوځ د اکتوبر پر لومړۍ ویلي ول چې د لبنان له پولې سره یې "محدود ځمکني عملیات" پیل کړي دي.
حزب الله په داسې حال کې په لومړي ځل د لبنان په خاوره کې د جګړې خبر ورکوي چې له تېرې اونۍ راهیسې یې له اسراییل سره ترینګلتیا لا زیاته شوې ده. اسراییلیو ځواکونو په هغه موده کې د لبنان په جنوب کې بمبارۍ کړې دي او د پلازمېنې بیروت ښار په جنوبي څنډه کې یې په یو هوايي برید کې د حزب الله مشر حسن نصرالله وواژه.
حزب الله تر دې مخکې د اکتوبر پر دویمه دا هم وویل چې هغه اسراییلي پوځیان یې له لبنانه ایستلي دي چې د هغه هېواد په شمال ختیزه پوله پراته یو کلي ته یې د داخلېدو هڅه کوله.
