د دې اوونۍ د "هارون باچا هنري ګړۍ" خپرونې مېلمه د ملاکنډ يو ځوان سندرغاړی او رباب غږوونکی تنوير عباس وير دی. ده په اسلام اباد کې د خپل سبق او روزګار ترڅنګ موسيقۍ ته هم وخت ورکړی دی. وير وايي، موسيقي يې تر ډېره د نومياليو رباب غږوونکو او سندرغاړو له يوټيوب چینلونو ياده کړې. دی البته زياتوي چې اوسمهال د يوه استاد په لټه کې دی چې په باقاعده توګه موسيقي ترې زده کړي. د تنوير عباس وير دا خبرې او ځينې سندرې يې په خپرونه کې اورېدای شئ.