د عدالت سپکاوی څه دی؟ څنګه کېږي او سزا يې څه ده؟
د پاکستان تحريک انصاف د مشر او پخواني وزيراعظم عمران خان پر ضد د عدالت د توهين په يوه مقدمه کې د اسلام اباد های کورټ يوې پينځه کسيزه جرګګۍ د اګست ۳۱مې په اورېدنه کې نوموړي ته اووه ورځې مهلت ورکړ چې ورباندې د لګېدلي تور په اړه جمع کړي خپل ځواب ته بيا کتنه وکړي. پر عمران خان دا مقدمه تر هغې وروسته جوړه شوې چې نوموړي د اګست پر ۲۰مه په اسلام اباد کې د خپل ګوند يوې احتجاجي جلسې ته په وينا کې يوې ججې او د دې ښار پوليس افسرانو ته دړکې ورکړې. د عمران خان پرضد د توهين عدالت قضيې موضوع د پاکستانيو ټېلېويژن چينلونو ترڅنګ پر ټولنيزه ميډيا هم خورا ګرمه ده. په دې اړه زموږ همکار هارون باچا له ايډووکېټ شبير حسين ګګياڼي سره، چې دی د پېښور های کورټ ترڅنګ په پاکستان سپريم کورټ کې هم وکالت کوي، مرکه کړې او په سر کې يې ترې پوښتلي چې يو څوک ولې او څنګه د عدالت د توهين مرتکب شي؟
