د بلوچستان چارواکي وايي چې په پلازمېنه کوټه او نورو سيمو کې د بارانونو او سېلاوونو له کبله شپږ کسان مړه او ۱۳ ژوبل شوي دي.
د صوبې د کورونيو چارو سلاکار مير ضیا لانګو د جولای پر څلورمه نېټه په کوټه کې خبريالانو ته وويل چې له ډيرې مودې وروسته په صوبه کې بارانونو شوي او د ده په وینا زیات زیانونونه يې اړولي دي.
د پشکال يا وسي د بارانونو دا دويمه لړۍ د جولای له څلورمې پیل شوې او د موسمياتو د ادارې په وينا، ښايي يوه اوونۍ دوام وکړي.
بارانونه د کوټې په ګډون پښتون مېشتو سيمو ږوب، پشين، لورالايي (بوري)، بارکان، او بلوڅ مېشتو سيمو قلات، منګوچر، خضدار، مستونګ او شاوخوا نورو سيمو کې شوي دي. د بارانونو له وجې زیات ځاني زیان په کوټه کې اوښتی چې د چارواکيو په وينا، د کورونو نړېدو او سيلابونو له کبله شپږ کسان مړه او ۱۳ زخميان شوي دي.
د قدرتي افتونو د نظم ادارې (پي ډي اېم اې) د بلوچستان مشر نصير احمد مېنګل د جولای پر څلورمه مشال رېډیو ته وويل چې د کوټې په سریاب سړک د دېوال نړېدو په پېښه کې پنځه کسان مړه شوي چې پکې دوه ماشومان، دوې ښځې او يو سړی شامل دي.
د کوټې په خلجي کالونۍ کې هم يوه ښځه د بجلۍ د کرنټ له وجې مړه شوې ده.
پر ټولنيزو رسنیو د کوټې د باران ويډيوګانې خپرې شوې چې پکې د ښار پر سړکونو اوبه ډنډ ولاړې او په ځينو سيمو کې خوړونه بهیېږي. د تېزو بارانونو له کبله په صوبه کې د بجلۍ ستنو او تارونو ته هم زیان رسېدلی چې له امله يې بجلۍ بنده شوې ده.
د بلوچستان اعلا وزير مير قدوس بزنجو د جولای پر څلورمه په بیان کې پر رسېدلو زیانونو خفګان ښوولی او د صوبې په روغتونو کې يې بېړنۍ حالت اعلان کړی دی.
بلوچستان له څو کالونو راهيسې د بارانونو د نیشتوالي له کبله له زښتې وچکالۍ سره مخامخ دی او په ډېرو سيمو کې اوبه وچې شوې چې ان د کوټې او بوري په شان ښارونو کې خلک د څښاک اوبه په ټانکرانو کې په پيسو اوبه رواړي. د وچکالۍ له کبله ډېر باغونه وچ شوي او ځينو کورونيو د روزګار لپاره کراچۍ او نورو سيمو ته کډه کړې ده.
