Ҷо Байден, президенти Амрико, дар охири моҳи апрели имсол тарҳи қонунеро имзо кард, ки агар TikTok соҳибашро давоми нӯҳ моҳ дигар накунад, баста мешавад.

Додгоҳ даъвои ширкати ByteDance, молики ТикТок-ро дар бораи набастани ин шабака дар ИМА беасос донист.

Ҷонибдорони маҳдуд кардани TikTok мегӯянд, ин шабака ба амнияти миллии Иёлоти Муттаҳида хатар дорад. Ба бовари онҳо, ҳукумати Чин метавонад аз ширкати ByteDance, ки молики ТикТок аст, маълумоти шахсии корбарон аз Амрикоро талаб кунад. Ин шабака иддаоро рад мекунад.

TikTok қонунро нақзи ҳуқуқи 170 миллион корбари ин шабака дар ИМА медонад.

Бар асоси қонун ин шабака бояд 19 январи соли оянда баста шавад. Дар сурати баста нашудан онро 850 миллиард доллар ҷарима интизор аст.

Доналд Трамп, президенти ИМА ваъда дода буд, ки ин шабакаро "наҷот" медиҳад. Ӯ 20-уми январ ба кор оғоз хоҳад кард. Дар ин сурат эҳтимол TikTok як рӯз дар Амрико баста шавад.

Тасвирҳоро ширкати “Maxar” рӯзи 13-уми декабр нашр кард.

Тибқи он, дастикам ду ҳавопаймои борбар дар пойгоҳи Ҳмеймим дида мешаванд.

Ба гузориши “Рейтерс”, ин ду ҳавопаймо навъи “АН-124” ҳастанд, ки асосан барои интиқоли борҳои вазнин истифода мешаванд.

“Maxar” навиштааст, дар тасвирҳои нави моҳвораӣ чархболи Ка-52 ва бахшҳои низоми дифоии S-400 низ ба чашм мехӯранд.

Русия дар солҳои охир барои пуштибонӣ аз ҳукумати Башор Асад дар Сурия ҳузури низомӣ дошт. Ҳукумати Башор Асад рӯзи 8-уми декабри 2024 суқут кард.

Ҳафтуним ҳазор сарбозу афсари Русия дар ду пойгоҳ – Тартус ва Ҳмеймими Сурия – ҷойгир буданд. Чанд рӯз пеш дар тасвирҳои моҳвораӣ дида шудааст, ки киштиҳои низомии Русия пойгоҳи Тартусро тарк мекунанд.

Додрас Имон Афшорӣ рӯзноманигорро ба "ҳамкорӣ бо ҳукумати Амрико", ки Ҷумҳурии Исломӣ "душман" мехонад, гунаҳкор донист.

Ризо Вализода пас аз даҳ сол кор дар Радиои Фардо, моҳи ноябри соли 2022, аз ин расона рафт. Пас аз муддате будубош дар хориҷ ба дидори наздиконаш ба Эрон баргашт ва моҳи октябри соли 2024 боздошт шуд.

Ба иттилои Радиои Фардо, Вализода дар ду ҷаласаи додгоҳӣ дар моҳи ноябр тавонистааст, "ним соат аз худ дифоъ кунад".

Наздиконаш гуфтаанд, Ризо Вализода ба як “доми амниятӣ” уфтод.

Худаш дар паёми охирин дар шабакаи “Х” навишта буд, ки бо Созмони иттилооти Сипоҳи посдорон музокироти нотамом дошт, аммо дар ниҳоят бе ягон замонатнома, на хаттӣ ва на шифоҳӣ, ба Эрон баргашт. Маълум нашуд, ӯ дар чӣ шароит ин навиштаро нашр карда буд.

Нашрияи "The New York Times" хабар дод, ки нерӯҳои Русия рӯзи панҷшанбе, 12-уми декабр, ҳамагӣ се километр дуртар аз канораҳои ҷанубии Покровск қарор доштанд.

Генерал Олександр Сирский, мақоми баландпояи артиши Украина, хоҳони таҳкими мудофеони Украина дар майдони набард алайҳи нерӯҳои таҷовузгари Русия шуд.

Владимир Зеленский, раисҷумҳури Украина, низ хост, ба минтақа нерӯҳои иловагӣ фиристанд. Вай рӯзи панҷшанбе барои мулоқот бо сарбозон ба хати ҷабҳа рафта буд.

Русия ҳамлаҳоро ба Украина дар ҳоле афзоиш додааст, ки талошҳои дипломатӣ барои поён додан ба ҷанг бештар шудааст.

Ин дафъа ӯ ба “нофармонӣ” дар дохили зиндон гунаҳкор шудааст.

Ҳукм рӯзи 13-уми декабр содир шуд. Тафсилоташ маълум нест.

Иҳар (Игор) Карнейи 56-соларо дар моҳи март бо иттиҳоми ҳамкорӣ бо гурӯҳи “ифротгаро” се сол аз озодӣ маҳрум карданд.

Манзури мақомот иртиботи ӯ бо Анҷумани рӯзноманигорони Беларус аст.

Ин созмон соли 2023 гурӯҳи “ифротгаро” эълон шуда, ҳоло дар хориҷ аз Беларус кор мекунад.

Ҳукумати худкомаи Александр Лукашенко пас аз интихоботи ҷанҷолии соли 2020 ба саркӯби шадиди мухолифон, фаъолон ва хабарнигорон идома медиҳад.

Вай аз соли 2012 раёсати Федератсияро ба дӯш дорад. Ҳамзамон шаҳрдори Душанбе ва раиси Маҷлиси Миллӣ аст, ки амалан шахси дувум дар ҳукумат ба шумор меравад.

Интихоби дигарбораи Рустами Эмомалӣ ба мақоми президенти ФФТ рӯзи 14-уми декабр дар конгресси ҳисоботӣ ва интихоботӣ бе иштироки ӯ ва бидуни рақиб сурат гирифтааст. Вай то соли 2028 дар ин мақом хоҳад буд.

Хуршед Мирзо муовини аввал, Алишер Урунов, Сайвалӣ Дониёрзода ва Искандар Ҷалилов муовинони президенти Федератсияи футболи Тоҷикистон интихоб шуданд.

Дар конгресси ҳисоботию интихоботӣ фаъолияти ФФТ дар солҳои 2020-2024 низ баррасӣ шуд.

Дастоварди бузургтарини футболи тоҷик дар ин давра ба қисми ниҳоии Ҷоми футболи Осиё роҳ ёфтани тими миллии футболи кишвар мебошад. Дастаи мунтахаби Тоҷикистон бори аввал дар таърихи худ имсол дар қисми ниҳоии қаҳрамонии Осиё дар Қатар ширкат карда, то ба даври чаҳорякниҳоӣ роҳ ёфт.

Аммо баъзе аз коршиносони соҳа бе зикри номи худ гуфтанд, рақобат барои унвони қаҳрамони Тоҷикистон он қадар пуршиддату шавқангез сурат намегирад. Барои мисол, дар Лигаи олии Тоҷикистон 11 соли охир танҳо як даста, “Истиқлол”-и Душанбе, ғолиб мешавад.

Масъалаи дигар, ба гуфтаи онҳо, чигунагии вазъи майдонҳост. Солҳои охир дар кишвар варзишгоҳҳои зиёд сохта шуданд, вале чамани ин майдонҳо аслан сунъист. Ҳоло майдони Варзишгоҳи марказии ҷумҳуриявӣ чамани сунъӣ дорад ва дастаҳое, ки ба Тоҷикистон барои бозӣ меоянд, аз ин чиз ҳамеша шикоят мекунанд. Зеро онҳо барои бозӣ кардан дар чунин шароит одат накардаанд.

ИНЧУНИН, БИХОНЕД:

Алишер Аминов: "Дастоварди бозигарони тоҷик бо табрики онҳо хотима наёбад" ВИДЕО

Бори аввал нест, ки наздикони раисҷумҳури Тоҷикистон раёсати ниҳодҳои варзиширо соҳиб мешаванд. Худи ӯ президенти Кумитаи миллии олимпист. Наберааш Исмоили Маҳмадзоҳир раиси Федератсияи ҷудо, домодаш Шамсулло Соҳибов раиси Ассотсиатсияи намудҳои зимистонаи варзиш ва хешовандаш Зайнулло Шарифзода раиси Федератсияи таэквандои Тоҷикистон ҳастанд.

Айбномаи зидди ӯ маълум нест.

Насрин Сутуда, ҳуқуқдон ва вакили саршинос, дар суҳбат бо Радиои Фардо амали мақомотро "ғайриқонунӣ" номид.

Ӯ гуфт, шавҳараш дар соли 2018 дар иртибот бо як парванда боздошт, вале баъдан афв шуда буд.

Додгоҳи инқилоби Теҳрон моҳи феврали соли 2019 Ризо Хандонро ба "ҳамдастӣ алайҳи амнияти миллӣ" ва "таблиғи зидди давлату ҳиҷоб" муттаҳам кард.

Насрин Сутуда аз соли 2010 то кунун борҳо боздошт шудааст.

"Консерти корвонсаро" шаби 11-уми декабр ба таври зинда дар Интернет пахш шуд. Ҳазорон кас онро тамошо карданд.

Аҳмадӣ бо либоси китфаш бози аврупоӣ ҳозир шуда, бо ёрии гурӯҳе аз ҳунармандон таронаҳои машҳури эрониро замзама кард.

Ин барнома дар як корвонсарои қадимӣ дар яке аз даштҳои Эрон барпо шудааст.

Дар ҳоле ки бисёре аз корбарони шабакаҳои иҷтимоӣ аз шуҷоати ӯ ситоиш карданд, мақомоти ҳифзи ҳуқуқи Эрон гуфтанд, ки зидди ӯ парвандаи ҷиноӣ боз шудааст.

Радиои Фардо, бахши эронии Радиои Озодӣ, навишт, марги Маҳсо Аминӣ ва эътирози "Зан, зиндагӣ, озодӣ" бисёре аз занону духтарони ҳунармандро ба майдон баровард, ки аз ҳиҷоби маҷбурӣ ва поймоли ҳуқуқи инсон дар Эрон норозиянд.

Бисёре аз корбарони шабакаҳои иҷтимоӣ Парасту Аҳмадиро ҳам як намунае аз муборизаи занон барои озодиву ҳуқуқашон донистаанд.

Департаменти давлатӣ ё Вазорати корҳои хориҷии Амрико рӯзи 12-уми декабр гуфт, “судури виза барои касоне, ки масъул ё шарики суст кардани демократия дар Гурҷистон ҳастанд, манъ хоҳад шуд."

Танишҳо дар Гурҷистон пас аз эъломи пирӯзии ҳизби ҳокими "Орзуи гурҷӣ" дар интихоботи порлумонии 26-уми октябр боло гирифт.

Мухолифон ва раисҷумҳури ғарбгарои Гурҷистон, Саломе Зурабишвили, гуфтанд, ки дар ин маърака бо мадади Маскав тақаллуб сурат гирифтааст.

Баъди он ки ҳукумати Гурҷистон рӯзи 28-уми ноябр музокиротро дар бораи пайвастани Гурҷистон ба Иттиҳоди Аврупо то соли 2028 боздошт, эътирозгарони зиёд ба хиёбонҳои пойтахт, Тбилиси, баромаданд.

Мақомот барои пароканда кардани онҳо аз зӯр ва обу гази ашковар истифода карданд.

Иёлоти Муттаҳида рӯзи 4-уми декабр аз ҳукумати Гурҷистон талаб кард, ки бо мардуми норозӣ боэҳтиромона муносибат кунад.

Рақобати ниҳоӣ, ки Доммараҷу бо донаҳои сиёҳ бозӣ мекард, бо пирӯзии ӯ анҷом ёфт. Натиҷаи ниҳоии бозӣ 7,5:6,5 ба фоидаи Доммараҷу шуд.

Доммараҷу 18 сол дорад ва ҷавонтарин қаҳрамони ҷаҳон дар риштаи шоҳмоти классикӣ гардид. Вай пас аз Вишванатан Ананд дуюмин қаҳрамони ҷаҳон аз Ҳиндустон аст. Дарвоқеъ, Ананд, ки қаҳрамони 15-уми ҷаҳон аст, мураббии Гукеш мебошад.

Насибҷон Амонӣ, рӯзноманигор ва шореҳи шоҳмот, гуфт, ки пеш аз ду бозии асосии ниҳоӣ қаҳрамони ҷаҳон Динг Лирен бартарии равонӣ ва имкони бештаре барои дар даст нигоҳ доштани тоҷи шатранҷро дошт.

Вай афзуд, “бисёриҳо акнун бар ин бовар буданд, ки чун Динг Лирен бозии 13-умро бо донаҳои сиёҳ мусовӣ анҷом дод, барои дастёбӣ ба ҳадафи ниҳоӣ басо наздик шуд, зеро дар бозии охирин ӯ донаҳои сафедро дар ихтиёр дошт. Вале дар охири бозии ниҳоӣ, ки шатранҷбози чинӣ ҳарчанд як пиёда камтар дошту вале ҳама натиҷаи онро мусовӣ мегуфтанд, ба иштибоҳ роҳ дода, дар ҳаракати 59-ум таслим шуд.”

Ба ин тартиб, Гукеш баробари соҳиб шудан ба унвони қаҳрамонӣ, ҳамчунин дар таърихи шоҳмоти ҷаҳон рекорди наве гузошт: ӯ нахустин шатранҷбозе гардид, ки дар 18-солагӣ шоҳи шатранҷи ҷаҳон шуд.

Дар шаҳри ҷанубии Одесса чанд таркиш ба вуқуъ пайваст.

Владимир Зеленский, раисҷумҳури Украина, ҳамларо “террор” хонд.

Вай дар изҳороте гуфт, ин вазъ баёнгари он аст, ки президенти Русия Владимир Путин “бо гапи хушку холӣ” аз роҳаш намегардад.

Тибқи гузоришҳои ибтидоӣ, Русия дар ин рӯз ба хоки Украина 93 мушак, аз ҷумла як мушаки Куриёи Шимолӣ ва ҳудуди 200 ҳавопаймои бесарнишин сар додааст.

“Укрэнерҳо”, ширкати таъминкунандаи барқ, пештар хабар дода буд, ки ҳамлаҳо сабаби маҳдудияти барқ дар саросари Украина гаштанд.

Човандозҳои маҳаллӣ бо ҳаводорони худ ҳафтаи гузашта дар майдони бузкашӣ дар ноҳияи Фархор ҷамъ омаданд.

Дар миёни онҳо Нодир Тешаев яке аз ботаҷрибатаринҳост. Бо вуҷуди он ки чанд дафъа тасмим гирифт, бузкаширо тарк кунад, мухлисонаш ӯро аз саҳна дур шудан намемонанд.

“Бузкашӣ чизе надодааст, ба ҷуз шуҳрат ва ёру рафиқдорӣ. Ҳар заҳмате, ки човандоз мекашад, танҳо барои мухлисонаш аст,” – гуфт Нодир Тешаев.

Видеоро дар инҷо бинед:

Embed ба дигарон фиристед

Дар Хатлон мавсими бузкашӣ оғоз ёфт

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:54 0:00

Ҷоизаҳои бузкашӣ аз 100 сомонӣ сар шуда, то бузу гӯсфанд иборат буданд. Ҳар човандоз талош мекард, соҳиби ҷоиза шавад. Тамошобинон човандози дӯстоштаи худро ташвиқ мекарданд.

Дар Тоҷикистон ҳар сол дар фасли зимистон бузкашӣ ташкил мешавад. Ин маросим дар ноҳияҳои гуногун то Наврӯз идома мекунад.

Аксҳои бештар:

• Маҳмудҷон Раҳматзода

Мавсими нави бузкашӣ, ки ҳоло дар Тоҷикистон як навъ варзиш медонанд, дар вилояти Хатлон оғоз ёфт. Ин маърака то ҷашни Наврӯз идома хоҳад кард.

Меҳвари гуфтугӯҳои ду тараф таҳаввулоти Сурия буд. Ба навиштаи "Рейтерз", ин дидор дар ҳоле анҷом шуд, ки шимоли Сурия дар рӯзҳои охир шоҳиди даргириҳое байни курдҳои мавриди ҳимояти Амрико ва нерӯҳои мавриди ҳимояти Туркия буд.

Бино ба баёнияи дафтари раисҷумҳури Туркия, Раҷаб Таййиб Эрдуғон дар ин мулоқот таъкид кардааст, ки кишвараш "барои амнияти миллии худ" чораҳои пешгирона дар Сурияро алайҳи ҳамаи "гурӯҳҳои террористӣ" анҷом хоҳад дод.

Ӯ ҳамчунин аз ҷомеаи байнулмилалӣ хост, барои бозсозии ниҳодҳо дар Сурия бо якдигар ҳамкорӣ кунанд.

Аз сӯи дигар, Энтони Блинкен эълон кард, ки бо раисҷумҳури Туркия дар бораи "амнияти минтақаӣ ва интиқоли сиёсӣ дар Сурия", гуфтугӯ кардааст.

Ӯ дар шабакаи иҷтимоии "Х" навишт, раванди интиқол дар Сурия бояд "таҳти раҳбарии Сурия" ва "шомили ҳамаи суриягиҳо" бошад ва аз ҷони ғайринизомиён муҳофизат шавад.

Ба гузориши хабаргузории "Рейтерз", ин ҳамла чанд соат пас аз қабули қатъномае дар Маҷмаи умумии СММ сурат гирифт, ки дар он оташбаси фаврӣ дар Ғазза дархост шудааст.

Дар яке аз ҳамлаҳое, ки шаби чаҳоршанбе то рӯзи панҷшанбе анҷом шуд, як хона дар паноҳгоҳи "Ан-Насирот" ҳадаф қарор гирифтааст.

Аз ин ҷумла, бемористони "Шуҳадои Ал-Ақсо" дар наздикии шаҳри Ал-Балаҳ хабар додааст. Кушташудагон ва захмиёни ҳодиса ба ин бемористон интиқол дода шуданд.

Дар ду ҳамлаи дигар 15 тан аз афроде, ки аъзои кумитаҳои маҳаллӣ буданд, кушта шудаанд. Ин кумитаҳо ба ҳадафи ҳифозати корвонҳои ҳомили кумакҳо таъсис дода шудаанд.

Дар қатъномае, ки рӯзи чаҳоршанбе аз сӯи Маҷмаи умумии СММ қабул шуд, аз идораҳои Созмони Милал дар умури паноҳандагон ҳимоят шудааст. Исроил фаъолияти ин идораро манъ кардааст.

Ба иттилои манбаъ, ба гурӯҳҳои гуногуни оилаҳои камбизоат дар ҳаҷми 600 сомонӣ кӯмаки яквақта супорида шуд.

Ин маблағҳо дар доираи "Лоиҳаи навсозии ҳифзи иҷтимоӣ ва ҳамгироии иқтисодӣ" будааст, ки тавассути грантҳои байнулмилалӣ маблағгузорӣ мешавад.

Кӯмакпулӣ асосан ба шахсоне дода мешавад, ки дар рӯйхати шахсони камбизоати ҷамоатҳои деҳот, номашон сабт шудааст.

Ҳарчанд на ҳама шахсони камбизоат ба гуфтаи худашон, метавонанд дар ин рӯйхат сабти ном шаванд.

Созишнома дар хусуси ин тарҳ бо Ассотсиатсияи байнулмилалии рушд ба маблағи 35 млн доллар, моҳи июни соли 2023 ба имзо расида буд.

Файзулло Бодуров 40 сол дошт.

Шахсони наздик ба ӯ гуфтанд, ки Бодуров аз тарафи мақомоти Русия ва “бо шарти таслим таслим накарданаш ба Тоҷикистон ба ҷанги зидди Украина бурда шуда буд”.

Яке аз онҳо (ба далели амниятӣ номаш фош намешавад) гуфт, Бодуров дар Тоҷикистон бо иттиҳоми тундгароӣ бо истифода аз Интернет (моддаи 307-и Кодекси ҷиноӣ) таҳти пайгард қарор дошт.

“Ҷониби Русия бо ин шарт, ки агар ба ҷанги Украина равад, истирдод нахоҳад шуд, ӯро ба Украина бурданд. Хабари кушта шуданаш рӯзи 15-уми ноябр расид,” – гуфт ҳамсуҳбати мо.

Файзулло Бодуров соҳиби як фарзанд буда, тайи солҳои охир дар Маскав мезист. Дӯстонаш дар Русия гуфтанд, ӯ дар шабакаҳои иҷтимоӣ бардошту хотираҳои худро менавишт.

Ҳафтаи гузашта ҷасади як зодаи дигари Хоруғ бо номи Фарид Хайруллобеков аз майдони ҷанг дар Украина ба Маскав оварда шудааст. Сабаби ба ҷанг бурдан ё рафтани ӯ маълум нест.

Моҳи июли имсол дар бораи кушта шудани ду зодаи ноҳияи Ишкошим дар ҷанги Русия дар Украина хабар расида буд.

Теъдоди дақиқи зодагон ё шаҳрвандони Тоҷикистон, ки ба ҷанги Украина ҷалб шудаанд, маълум нест. Танҳо исми бештар аз сад нафари онҳо пас аз фавт ё дар асорат дар Украина расонаӣ шудааст.

Ширкати шаҳрвандони Тоҷикистон дар ҷанги кишварҳои бегона ҷиноят аст. Бо ин вуҷуд, дар ҷанги Русия алайҳи Украина, ки дар моҳи феврали соли 2022 оғоз шуда, сабаби маҳкумиятҳои байнулмилалӣ гардид, зодагон ё шаҳрвандони Тоҷикистон бо тарзҳои гуногун ҷалб мешавад. Онҳоро ба се гурӯҳ тақсим кардан мумкин аст:

1. Сарбозону афсароне, ки дар артиши Русия хидмат мекарданд;
2. Муҳоҷирони корӣ, ки бо ваъдаи шаҳрвандиву пули калон ба ҷанг ҷалб шуданд;
3. Зиндониёни тоҷик, ки дар шароити номаълум ба ҷанг бурда шуданд.

Мақомоти Тоҷикистон дар бештар аз ду соли охир танҳо то сад мавриди ҷалби маҳбусони тоҷикро аз зиндонҳои Русия ба ҷанг тасдиқ карда, вале дар бораи иштироки тоҷикистониҳо дар ҷанги зидди Украина парвандае боз накардаанд.

Хабаргузории "Франс Пресс" ва DPA-и Олмон ба нақл аз шабакаҳои вобаста ба ДОИШ навиштанд, ки ҳамларо як бомбгузори маргталаб анҷом додааст.

Халилурраҳмон Ҳаққонӣ, вазири муҳоҷирин дар ҳукумати "Толибон", рӯзи 11-уми декабр дар ҳамла ба ҷойи кораш дар Кобул кушта шуд.

Вай бародари Ҷалолиддин Ҳаққонӣ, муассиси шабакаи "Ҳаққонӣ" ва амаки Сироҷиддини Ҳаққонӣ, вазири корҳои дохилии "Толибон" аст.

Амрико соли 2011 барои маълумот дар бораи Халилурраҳмон Ҳаққонӣ 5 миллион доллар ҷоиза эълон карда буд.

Шохаи "Хуросон"-и ДОИШ соли 2014, замоне пайдо шуд, ки гурӯҳи тундрави “Давлати исломӣ” бахше аз қаламравҳои Ироқ ва Сурияро тасарруф карда, “хилофат”-и худхонда эълон карда буд. Давлате, ки ба гуфтаи онҳо бар пояи шариат идора мешуд. Дертар ДОИШ аз тарафи эътилофи низомии таҳти раҳбарии Амрико саркӯб гардид.

Ин гурӯҳ пас аз бозгашти “Толибон” ба қудрат дар бештар аз се соли охир масъулияти чанд ҳамлаи маргборро дар Афғонистон бар уҳда гирифтааст.

Қарор рӯзи 11-уми декабр дар шаҳри Сюрих ба далели ҳузур надоштани номзади дигар бе овоздиҳӣ қабул шуд.

Баъзе аз кишварҳои аврупоӣ, аз ҷумла Федератсияи футболи Инглистон (Англия), тасмими ФИФА-ро ба далели вазъи бади ҳуқуқи инсон ва қонунҳои маҳдудкунанда дар Арабистони Саудӣ танқид карданд.

Пас аз мизбонии Қатар дар соли 2022, Ҷоми ҷаҳонии соли 2034 бори дувум дар Ховари Миёна баргузор хоҳад гашт.

Бо дарназардошти он ки Ҷоми ҷаҳонии соли 2026 дар Иёлоти Муттаҳида, Мексика ва Канада ва бозиҳои соли 2030 дар Аврупо, Африқо ва Амрикои Ҷанубӣ баргузор мешавад, танҳо кишварҳои узви Конфедератсияҳои Осиё ва Уқёнусия иҷозат доштанд, ки барои мизбонии соли 2034 дархост диҳанд.

Арабистони Саудӣ тайи солҳои охир ба соҳаи варзиш сармояи зиёде харҷ карда, гуфтааст, ки мизбони хуби ин мусобиқот хоҳад буд.

Владимир Зеленский, раисҷумҳури Украина, дар посух Орбанро танқид кард, ки ба ҷойи пуштибонӣ аз Иттиҳоди Аврупо аз пайи манфиатҳои шахсист.

Ӯ дар шабакаи "X" (Твиттери собиқ) навишт, дар бораи ҷанге, ки Русия алайҳи Украина оғоз кардааст, бе ҳузури Украина ягон музокира намешавад.

Сарвазири Маҷористон дар посух гуфт, таассуфовар аст, ки Зеленский дар остонаи Соли нав оташбас ва табодули теъдоди зиёди зиндониёнро намепазирад.

Пас аз тақрибан се сол ҷанг, талошҳои дипломатӣ дар Брюссел ва Вашингтон барои хотима бахшидан ба таҷовузи Русия ба хоки Украина шиддат мегиранд.

Қарор аст, Доналд Трамп рӯзи 20-уми январи соли 2025 дар мақоми раисҷумҳури Иёлоти Муттаҳидаи Амрико савганд ёд кунад. Ӯ гуфтааст, поён додан ба ҷанг дар Украина аз авлавиятҳои кораш аст.

Русия талош дорад, то замони савгандёдкунии Трамп қаламрави бештари Украинаро тасарруф кунад. Аз сӯйи дигар, Украина низ талош дорад, мавқеи худро дар музокироти эҳтимолии сулҳ таҳким диҳад.

Шаҳриёр Ҷабборов, сокини 25-солаи шаҳри Душанбе ба он муттаҳам мешавад, ки дар ҳудуди вилояти Маскави Русия ба муҳоҷирони тоҷик фишор оварда бо таҳдид аз онҳо дар ҳаҷми аз панҷ то 20 ҳазор рубл меситонидааст.

Ҷабборов худро ҳамчун муҳофизи муҳоҷирони тоҷик нишон дода, вале ба гуфтаи мақомот, ҳар нафаре, ки аз гапаш берун мерафтааст, бо рафиқони худ бо роҳи фишор ва лату куб аз онҳо пул меситонидааст.

Дар барномаи телевизионии Вазорат, ки рӯзи 11-уми декабр нашр шуд, чанде аз ҷабрдидагон шаҳодат медиҳанд, ки Ҷабборов ба ҳайси нигаҳбон ё "смотряший"- и ин минтақа бояд аз ҳар тоҷик 50 ҳазор рубл мегирифтааст.

Дар сурати муваффақ нашудан, ба гуфтаи ҷабрдидаҳо, Ҷабборов бо лату куб ва таҳдиди марг аз онҳо пул дарёфт мекардааст.

Худи Шаҳриёр Ҷабборов зимни бозпурсӣ, ки маълум нест таҳти кадом шароит сабт шудааст, иқрор мешавад, ки муҳоҷирони тоҷикро аз ҷойи корашон пайдо карда, бо таҳдиду зӯрӣ пул меситонд.

Ҳоло Шаҳриёр Ҷабборов дар ҳабси пешакӣ қарор дошта, нисбаташ парвандаи ҷиноятӣ оғоз шудааст.

Номи ин ҷавон оварда нашудааст, аммо гуфта мешавад, ки ӯ ҳанӯз се моҳ қабл дар моҳи августи соли равон шаҳрвандии Русияро гирифта буд. Қарор дар бораи бекор кардани шаҳрвандии ӯро Раёсати муҳоҷирати Вазорати корҳои дохилӣ содир кардааст.

"Шиносномаи Русия, ки ба ин ҷавон дода шудааст, беэътибор дониста шуд ва ӯ муваззаф аст, қаламрави кишвари моро тарк кунад, зеро вай асосҳои қонунии будубошро дар он ҷо аз даст додааст", - омадааст дар изҳороти мақомоти Русия.

Моҳи августи соли 2024 раисиҷумҳури Русия Владимир Путин қонун дар бораи бақайдгирии ҳатмии ҳарбӣ пас аз гирифтани шаҳрвандии Русияро имзо кард. Риоя накардани ин талабот асос барои маҳрум кардан аз шаҳрвандии Русия мегардад. Ин қонун асосан ба муҳоҷирон аз Осиёи Марказӣ дахл дорад.

Тирамоҳи соли гузашта раиси Кумитаи тафтишоти Федератсияи Русия Александр Бастрикин пешниҳод кард, то муҳоҷироне, ки дар ҷанг алайҳи Украина иштирок кардан намехоҳанд, аз шаҳрвандӣ маҳрум карда шаванд.

Пас аз ин изҳороти раиси Кумитаи тафтишот, рейдҳо алайҳи муҳоҷирон дар Русия бештар шуд. Нерӯҳои амниятӣ муҳоҷирони шаҳрвандии Русия доштаро боздошт карда, дар артиш сабти ном кардаанд.

Моҳи декабри соли гузашта гузоришҳо ба нашр расида буданд, ки шаҳрвандони хориҷӣ барои саркашӣ аз сабти номи ҳарбӣ аз шаҳрвандии Русия маҳрум шудаанд.

Дар ин бора сафорати Тоҷикистон дар шаҳри Тошканд рӯзи 11-и декабр хабар дод.

“Ин иқдом дар арафаи ҷашни 150-солагии фарзанди барӯманди халқи тоҷик устод Садриддин Айнӣ тӯҳфаи муносиб мебошад,” – навишт сафорат дар саҳифааш дар Фейсбук.

Ба иттилои манбаъ, раисҷумҳури Узбекистон Шавкат Мирзиёев қарорро дар ин замина рӯзи 5-уми декабр имзо кардааст.

Радиои Озодӣ соли 2023 дар бораи вазъи осорхонаи Садриддин Айнӣ дар Соктаре гузориш дода буд.

Садриддин Айнӣ муаллифи даҳҳо асари манзуму мансури таърихист, ки дар нашриёти Тоҷикистон чанд сол пеш онро дар Куллиёти 15-ҷилдӣ мунташир карданд.

Моҳи сентябри соли 1998 бо фармони раисҷумҳури Тоҷикистон ба ӯ унвони Қаҳрамони Тоҷикистон дода шуд ва аксаш бар рӯйи пули 5 сомонӣ ҷой гирифт. Дар Узбекистон ҳам ӯро ҳамчун саромади адабиёти навини ин кишвар мешиносанд.

Ба фарқ аз осорхонаи Айнӣ дар Самарқанду Бухоро, соли 2021 тибқи нақшаи шаҳрсозӣ қарор буд осорхонаи Садриддин Айнӣ дар Душанбе вайрон гардад. Иддае аз равшанфикрони тоҷик ва масъулони чаҳор созмони эҷодӣ бо пойфишорӣ, монеи вайрон кардани ин хона-музей гардиданд.

Ҷасади Наимҷон Неъматови 37-сола, ҳамсараш Нафиса Неъматоваи 33-сола ва фарзандонаш Аминаи 13-сола, Фотима ва Зӯҳрои 10-сола ва Муҳаммадюсуфи 2-сола шаби ҳаштуми декабр дар хонаашон ёфт шуд.

Ба нақли пайвандон, мақомот пештар онҳоро барои санҷиши пизишкиву додгоҳӣ ба шаҳри Хуҷанд бурда буданд.

Бо гузашти се рӯз мақомот на хабари ҳодисаро доданд, на тафсилоти марги мармузи онҳоро ошкор карданд. Сокинон дар минтақа нигаронанд.

Як манбаи боварбахш дар Вазорати корҳои дохилии Тоҷикистон рӯзи чоршанбе гуфт, ки таҳқиқ ба зиммаи муфаттишони Додситонӣ гузошта шудааст.

Embed ба дигарон фиристед

Дафни 6 узви оилаи Неъматов дар Конибодом

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:03:40 0:00

Куштори хонаводаи Неъматовҳо дар ҳолест, ки шаҳри Конибодом бештар аз як сол боз бо чунин ҳодисаҳо дар сархати расонаву шабакаҳои иҷтимоӣ қарор гирифтааст. Дастикам чанд аъзои шаш оила дар ин минтақа бо аломатҳои қасдан ба ҳалокат расондан ёфт шудаанд.

Масъулони мақомоти маҳаллӣ мегӯянд, қисме аз чунин ҳодисаҳо ба ҷанҷолҳои хонаводагӣ рабт доштанд ва таҳқиқи дигар ҳодисаҳо идома дорад. Дар як маврид аз даст доштани як нафар ё гурӯҳи беруна суҳбат шуда буд.

Дар ин бора Вячеслав Володин, раиси Думаи давлатӣ, рӯзи 11-уми декабр дар Телеграм хабар дод.

Иҷрои қонуни нав бояд аз аввали моҳи апрел сар шавад. Бар асоси он, фарзандони муҳоҷирон бе донистани забони русӣ ба мактабҳо пазируфта намешаванд.

Аз 410 вакил фақат як нафар ба зидди қонун рой дода, боқимонда аз он тарафдорӣ кардаанд. Володин гуфтааст, ҳангоми қабул ба мактаб минбаъд дар баробари донистани забони русӣ, қонунӣ будани ҳузури кӯдакон дар Русия ҳам санҷида мешавад

Пештар Думаи давлатии Русия бо нашри натиҷаҳои як таҳлил гуфта буд, 41 дар сади фарзандони муҳоҷирон дар ин кишвар бо забони русӣ мушкил доранд. Аммо дар ду минтақаи Русия ба қабули чунин қонун зид баромада, гуфта буданд, ки кӯдакони дур аз мактаб ба тоифаи ҷинояткорон хоҳанд пайваст.

Муҳоҷирони зиёд аз кишварҳои Осиёи Марказӣ, аз ҷумла Тоҷикистон, чанд моҳ боз аз он шикоят доранд, ки дархости онҳо барои қабули фарзандонашон ба мактабҳои Русия рад мешавад.

Як зани муҳоҷир аз Тоҷикистон моҳи ноябр бо муроҷиат ба Радиои Озодӣ гуфт, вақте хост, фарзандонашро дар Самара аз як мактаб ба мактаби дигар барад, онҳоро қабул накарданд ва ба ӯ дастур доданд, ки зудтар бо кӯдакон Русияро тарк кунад.

Русия мизбони бештар аз 1 миллион муҳоҷири кории тоҷик аст ва қонуни нав зиндагии ҳазорон нафари онҳоро, ки мехоҳанд фарзандонашонро аз худ дур накунанд, сахттар хоҳад кард.

Навор дар Инстаграм:

Дидору суҳбати ҳайатҳои ВКХ-и Тоҷикистон ва Фаронса рӯзи 12-уми декабр дар Порис (Париж) дар назар аст.

Паймони миллии Тоҷикистон, эътилофи се созмони мухолиф, мегӯяд, номаашро дар ин бора рӯзи 10-уми декабр ба Матие Комб (Matthieu Combe), муовини мудири шуъбаи Қафқоз ва Осиёи Марказӣ дар ВКХ-и Фаронса, фиристод.

Матие Комб дар моҳи ноябри имсол барои ҳамоҳанг кардани нишаст ба Тоҷикистон рафта буд.

"Созмонҳои муътабари ҷаҳонӣ режими Раҳмонро ҷузъи даҳгонаи хашинтарин ҳукуматҳои олам шинохтаанд, ки ба мухолифин, дигарандешон ва фаъолони ҷомеъа бераҳмтарин муносибатро раво мебинад. Кишвари демократие мисли Фаронса набояд ин воқеъиятро дар робитаҳои худ бо чунин режим нодида бигирад," – гуфта шудааст дар бахше аз нома.

Намояндагони мухолифон дар гузашта низ аз кишварҳои аврупоӣ хоста буданд, ки ҳангоми суҳбат бо мақомоти Тоҷикистон масъалаи ҳуқуқи башар ва зиндониҳоро бардоранд, вале аксар вақт аз натиҷааш гузориш дода намешавад.

Фаронса як шарики муҳими Тоҷикистон дар қаламрави Иттиҳоди Аврупо дониста мешавад. Ин кишвар соли 2008 барои сохтмони терминали Фурудгоҳи байнулмилалии Душанбе 49 миллион евро ёрӣ кард.

То соли 2014, давоми 12 сол, дар доираи амалиёти зиддитеррористии НАТО дар Афғонистон контингенти 170-нафарии низомиёни фаронсавӣ дар фурудгоҳи Душанбе мустақар буд.

Соли 2016 дар Душанбе маркази савдои “Ашан”, нахустин гипермаркети фаронсавӣ дар Осиёи Марказӣ боз шуд. Вале мизони додугирифти ду кишвар ҳамоно дар сатҳи ночиз мемонад.