Дар ин феҳрист мунтахаби Аргентина, қаҳрамони феълии ҷаҳон, бо 1886,16 имтиёз дар байни 211 тими миллӣ дар ҷойгоҳи аввал аст. Мунтахаби Испания, қаҳрамони феълии Аврупо, бо 1854,64 имтиёз дар ҷойгоҳи дувум ва мунтахаби Фаронса, ҷоизадори нуқраи қаҳрамонии ҷаҳон, бо 1852,71 имтиёз зинаи севумро соҳиб шудаанд.
Инчунин ба даҳгонаи беҳтарин тимҳои миллӣ Англия, Бразилия, Нидерланд, Португалия, Белгия, Италия ва Олмон дохиланд.
Аз байни тимҳои миллии кишварҳои пасошӯравӣ зинаҳои баландро дар феҳристи FIFA Украина (25-ум, 1559,81 имтиёз), Русия (35-ум, 1516,27 имтиёз) ва Узбекистон (57-ум, 1437,02 имтиёз) ба даст овардаанд.
Тоҷикистон дар байни кишварҳои собиқи шӯравӣ аз Қазоқистон (113-ум), Озарбойҷон (119-ум), Эстония (121-ум), Латвия (140-ум), Туркманистон (142-юм), Литва (143-юм) ва Молдова (154-ум) пеш буда, пас аз Украина (25-ум), Русия (35-ум), Узбекистон (57-ум), Гурҷистон (68-ум), Беларус (98-ум), Арманистон (102-юм) ва Қирғизистон (103-юм) ҷойгир шудааст.
Тоҷикистон дар байни тимҳои миллие, ки ба Конфедератсияи футболи Осиё (AFC) шомиланд, ҷойгоҳи 18-умро азони худ кардааст. Дар Осиё Ҷопон дар мақоми аввал (дар ҷаҳон 15-ум), Эрон дар мақоми дувум (дар ҷаҳон 18-ум) ва Кореяи Ҷанубӣ дар мақоми севум (дар ҷаҳон 23-юм) мебошанд.
Феҳристи FIFA аз соли 1993 ба ин сӯ тартиб дода мешавад. Натиҷаи беҳтарини мунтахаби Тоҷикистон дар тамоми таърихаш дар феҳристи FIFA ҷойгоҳи 99-ум ва натиҷаи пасттаринаш ҷойгоҳи 180-ум мебошад.
Дастаи мунтахаби Тоҷикистон зери раҳбарии сармураббӣ Гела Шекиладзе, мутахассиси гурҷӣ, имсол ду бозӣ анҷом дод. Футболбозони тоҷик 20-уми март дар Душанбе дар бозии дӯстона аз тими миллии Беларус бо ҳисоби 0:5 шикаст хӯрданд.
Бозии мунтахаби Тоҷикистон дар даври аввали марҳилаи интихобии Ҷоми Осиё-2027 дар гурӯҳи “А”, ки 25-уми март дар Варзишгоҳи марказии Душанбе доир гардид, бо ҳисоби 1:0 ба суди мизбонон хотима ёфт.
Баъди натиҷагирии бозиҳои даври якуми мусобиқа дар гурӯҳи “А” мунтахабҳои Филиппин ва Тоҷикистон сеимтиёзӣ гирифтаанд. Бо дарназардошти таносуби тӯбҳо филиппиниҳо (4-1) дар ҷойи аввал ва футболбозони тоҷик (1-0) дар ҷойи дуюм қарор доранд.
Футболбозони тоҷик дар даври дуюми мусобиқот 10-уми июн дар меҳмонӣ бо тими миллии Филиппин рақобат мекунанд.
Дастаи мунтахаби футболи Тоҷикистон дар марҳилаи интихобии Ҷоми Осиё-2027 дар гурӯҳи “А” бо тимҳои миллии Филиппин, Молдив ва Тимори Шарқӣ бозӣ мекунад.
Дар натиҷаи қуръакашӣ тимҳои миллӣ ба шаш гурӯҳи иборат аз чаҳордастаӣ тақсим шудаанд. Ҳар як даста дар гурӯҳ шаш бозӣ – се рақобат дар майдони худ ва се бозӣ дар меҳмонӣ - анҷом медиҳад.
Танҳо ғолибони гурӯҳҳо ба қисми ниҳоии Ҷоми Осиё, ки аз 15-уми январ то 8-уми феврали соли 2027 дар Арабистони Саудӣ баргузор мешавад, роҳ меёбанд.
