Ба иттилои Федератсияи футболи Беларус, ин мусобиқаи анъанавии байнулмилалӣ, ки дар толори варзишии Минск 16-уми феврал шуруъ шуд, 21-уми феврал ба поён мерасад. Марҳилаи аввали мусобиқа бо иштироки ҳашт даста дар ду гурӯҳ сурат гирифт.
Ба гурӯҳи «А» дастаҳои мунтахаби наврасони то 17-солаи Беларус, Узбекистон, Тоҷикистон ва тими Академияи «Blockchain Sports»-и Бразилия дохил буданд. Гурӯҳи «В» аз тимҳои мунтахаби наврасони то 17-солаи Русия, Қазоқистон, Озарбойҷон ва Эрон иборат буд. Тибқи дастури мусобиқа дар марҳилаи гурӯҳӣ дастаҳо аз рӯи системи даврӣ дар як давра бозӣ карданд.
Футболбозони навраси тоҷик зери раҳбарии Марко Раҷини, мутахассиси итолиёӣ, ки 16-уми феврал аз дастаи мунтахаби Беларус (U-17), 17-уми феврал аз тими Академияи «Blockchain Sports»-и Бразилия бо ҳисоби якхелаи 0:1 ва 19-уми феврал аз мунтахаби Узбекистон (U-17) бо ҳисоби 1:3 шикаст хӯрданд, бидуни имтиёз дар ҷадвали гурӯҳи “А” зинаи охиринро ишғол карданд.
Ҳамакнун дастаи “Тоҷикистон” 21-уми феврал барои ҷойи ҳафтум бо тими наврасони Эрон (U-17), ки дар ҷадвали гурӯҳи “В” бидуни имтиёз дар зинаи охирин қарор гирифт, рақобат мекунад.
Мавқеи дастаҳо дар гурӯҳи “А”: Беларус — 7 имтиёз, Узбекистон — 6, “Blockchain Sports" — 4, Тоҷикистон — 0.
Мавқеи дастаҳо дар гурӯҳи “В”: Русия — 7 имтиёз, Озарбойҷон — 6, Қазоқистон — 4, Эрон — 0.
Ғолибони гурӯҳҳо – Беларус ва Русия - ба финали мусобиқа роҳ ёфтанд. Дастаҳое, ки дар гурӯҳи худ ҷойи дуюмро гирифтанд, Узбекистон ва Озарбойҷон барои медалҳои биринҷӣ мубориза мебаранд. Инчунин бозии тасаллобахш барои ҷойи 5-ум байни дастаҳои“Blockchain Sports" ва Қазоқистон барпо мегардад.
21-уми феврал (ҷумъа):
Бозӣ барои ҷойҳои 7-8-ум - Эрон U-17 - Тоҷикистон U-17
Бозӣ барои ҷойҳои 5-6-ум - Blockchain Sports Academy - Қазоқистон U-17
Бозӣ барои ҷойҳои 3-4-ум - Узбекистон U-17 - Озарбойҷон U-17
Финал - Беларус U-17 - Русия U-17
Мусобиқаи байнулмилалии “Ҷоми рушд” дар Минск бори 21-ум баргузор шудааст. Соли гузашта ин мусобиқаи анъанавӣ бо пирӯзии мизбонон - футболбозони навраси Беларус ба анҷом расида буд.
Дар ин мусобиқа футболбозони навраси ҳафт кишвар - Русия (6 бор), Беларус (5), Украина (4), Белгия (2), инчунин Сербия ва Черногория, Тоҷикистон, Исроил - якборӣ ғолиб шудаанд.
Бояд гуфт, мусобиқаи байнулмилалии “Ҷоми рушд-2025” дар Минск барои футболбозони тоҷик як марҳилаи омодагӣ ба Ҷоми Осиё-2025 миёни дастаҳои мунтахаби наврасони то 17-сола маҳсуб меёбад, ки аз 3-юм то 20-уми апрели имсол дар Арабистони Саудӣ баргузор мешавад. Мунтахаби Тоҷикистон бар асоси қуръакашӣ дар гурӯҳи «D» бо дастаҳои Уммон (5-уми апрел), Кореяи Шимолӣ (8-уми апрел) ва Эрон (11-уми апрел) рақобат мекунад.
