Марта Кос, комиссари Иттиҳоди Аврупо барои тавсеа, ба зарурати ҳифозат аз Радиои Аврупои Озод/Радиои Озодӣ таъкид кард. Ӯ ҳушдор дод, ки агар ин корро накунанд, пас, ҳадяе барои ҳукуматҳои худкома дар саросари ҷаҳон хоҳанд дод.
Марта Кос ин суханонро рӯзи 1-уми апрел дар ҷараёни як баҳс дар ҷаласаи умумии Порлумони Аврупо дар шаҳри Страсбург баён кард. Баҳс сари ҳифзи дастрасӣ ба расонаҳои озод, аз ҷумла Радиои Аврупои Озод/Радиои Озодӣ равона шуда буд.
Ин баҳс дар вокуниш ба фармони иҷроие дар бораи коҳиши ҳадди аксари харҷу кори ҳафт идора, аз ҷумла USAGM баргузор гашт, ки Доналд Трамп, раисҷумҳури Амрико, 14-уми март имзо кард. Чанд соат баъди ин, амри боздошта шудани маблағгузории РАО/РО низ содир шуд.
Ҳарчанд ин тасмим баъдан бекор шуд, USAGM ҳанӯз ҳеч як аз буҷаи ҷудошуда аз сӯи Конгрессро нафиристодааст ва ин масъала боис шуд, ки Радиои Аврупои Озод/Радиои Озодӣ баъзе аз кормандони худро аз аввали моҳи апрел ба рухсатӣ бифристад.
Трамп, ки гуфтааст, бо харҷҳои беҳудаи давлатӣ мубориза мебарад, дар давраи аввали раёсати ҷумҳуриаш бо USAGM дар робита бо масъалаи мустақил будани сиёсати таҳририяи он ва ҳам мудирияти барномаҳо даъво кардааст.
Хонум Кос, ки ба намояндагӣ аз Кая Каллас, масъули сиёсати хориҷии Иттиҳоди Аврупо сухан мегуфт, таъкид кард, ки “Иттиҳоди Аврупо бояд паноҳгоҳе барои расонаҳои мустақил, ба шумули расонаҳое дар Русия ва Беларус бошад, то онҳо битавонанд ба кори худ идома диҳанд, нухбагони сиёсӣ ва иқтисодиро посухгӯ қарор диҳанд ва фасодро ифшо кунанд”.
Дар ҳоле ки хонум Кос аз шарҳи бештар дар бораи иқдоми Иттиҳоди Аврупо барои сармоягузории Радиои Аврупои Озод/ Радиои Озодӣ худдорӣ кард, чанд узви Порлумони Аврупо ба ин мавзуъ ишора карданд.
Себастиао Бугалҳо, намояндаи Португалия, аз калонтарин гурӯҳи порлумон, Ҳизби ростгарои мардуми Аврупо, гуфт, “мо хароҷоти онро хоҳем пардохт ва борашро бар дӯш хоҳем кашид”.
Виргиниюс Синкявичюс, вакили Литва аз Ҳизби сабзҳо таъкид кард, "мо бояд итминон ҳосил кунем, ки Радиои Аврупои Озод/Радиои Озодӣ ба манбаъҳои дарозмуддат ва пойдор, аз ҷумла аз сӯи Иттиҳоди Аврупо, дастрасӣ дошта бошад".
Александр Вондра, ки дар замони Чехославакияи коммунистӣ норозии барҷаста буд ва акнун ба унвони намояндаи Ҷумҳурии Чех аз гурӯҳи ростгарои муҳофизакорон ва ислоҳталабони Аврупо дар Порлумони Аврупо фаъолият мекунад, гуфт, ин радио ба пахши маълумот дар кишварҳои дорои ҳукуматҳои саркӯбгар, монанди Эрон, Беларус ва Русия кумак кардааст.
Ӯ аз Иттиҳоди Аврупо хост, ки дар таъмини молии Радиои Аврупои Озод/Радиои Озодӣ саҳм бигирад. Ва афзуд, "биёед, омода бошем, ки Радиои Аврупои Озод/Радиои Озодиро аз буҷаи Иттиҳоди Аврупо таъмини молӣ кунем ва дар мавриди шеваи он ба созиш бирасем".
Ин баҳс, ки як соат давом кард, гоҳе бисёр пуртаниш шуд ва намояндагон дар миёни суханрониҳо бар сари якдигар фарёд мезаданд.
Чанд намоянда аз гурӯҳҳои популисти ҳозир дар порлумони Страсбург бо истифодаи эҳтимолӣ аз буҷаи Иттиҳоди Аврупо барои сармоягузории ин расона мухолифат карданд.
Мари Хон, намояндаи Ҳизби ростгарои ифротии алтернатива барои Олмон, гуфт, Радиои Аврупои Озодӣ/Радиои Озодӣ худаш метавонад худашро сармоягузорӣ кунад. Вай афзуд, ки ин расона набояд аз сӯи ниҳодҳои аврупоӣ сармоягузорӣ шавад.
Милан Уҳрик, як намояндаи Словакия дар гурӯҳи миллатҳои мустақили Аврупо, гурӯҳе ки Мари Хон узви он аст, гуфт, ки Иттиҳоди Аврупо бояд ба ҷойи он, ба деҳқонони Словакия, мадад кунад. Ӯ афзуд, "расонаҳои мустақили шумо комилан баръакси расонаҳои мустақил аст".
Ҷулиен Санчез, намояндаи Фаронса аз ҷиноҳи популисти ростгарои ватанпарастон барои Аврупо, Порлумони Аврупоро ба "риёкорӣ" муттаҳам кард ва гуфт, ин ниҳод бо баҳс дар мавриди ин мавзуъ, дар умури дохилии Иёлоти Муттаҳидаи Амрико мудохила мекунад.
Дар ҷараёни ин баҳс, дар ҷаласаи умумӣ, ки 3-юми апрел ба поён мерасад, ҳеч қатъномае ба раъйгирӣ гузошта намешавад. Аммо чанд мақоми Порлумони Аврупо ба Радиои Аврупои Озод/Радиои Озодӣ гуфтанд, ки ин ниҳод ҳамчунин ба баррасии вазъият идома хоҳад дод ва мумкин аст дар марҳилаҳои баъдӣ дар ин бахш тасмиме гирифта шавад.
