Ба иттилои Федератсияи футболи Тоҷикистон, ду голи мунтахаби наврасони кишварро Муҳаммад Назриев ва як голи дигарро Назрулло Ашурализода ба самар расонданд.
Дастаи мунтахаби наврасони Тоҷикистон (U-17) зери раҳбарии сармураббӣ Марко Раҷини, мутахассиси итолиёӣ, дар ҳамин ҳол дар шаҳри Давҳа ба марҳилаи ниҳоии Ҷоми Осиё-2025 омодагӣ мебинад. Ба ҷамъомади таълимиву тамринии даста 24 бозигар даъват шудааст.
Бозии дуюми санҷишии футболбозони навраси тоҷик бо ҳамсолонашон аз Қатар дар Давҳа рӯзи панҷшанбеи 13-уми март дар варзишгоҳи Абдулло Бин Халифа соати 21:00 бо вақти маҳаллӣ (23:00 – бо вақти Душанбе) оғоз меёбад.
Бояд гуфт, ки марҳилаи ниҳоии Ҷоми Осиё миёни дастаҳои мунтахаби наврасони то 17-сола аз 3-юм то 20-уми апрели имсол дар Арабистони Саудӣ баргузор мешавад. Мунтахаби Тоҷикистон дар гурӯҳи «D» бо дастаҳои Уммон (5-уми апрел), Кореяи Шимолӣ (8-уми апрел) ва Эрон (11-уми апрел) рақобат мекунад.
Бар асоси натиҷаи марҳилаи гурӯҳӣ аз ҳар гурӯҳ ду тими беҳтарин ба даври чаҳорякниҳоии Ҷоми Осиё-2025 роҳ меёбанд. Ҳамаи иштироккунандагони даври чаҳорякниҳоӣ ба ҳаққи ширкат дар қаҳрамонии ҷаҳон-2025, ки аз 5-ум то 27-уми ноябр дар Қатар барпо мегардад, мушарраф мешаванд.
