Дар Тоҷикистон ӯро ба ҳамкорӣ бо ҳизбу иттиҳодияҳои иҷтимоӣ ё динии мамнуъ ва мусоидат ба фаъолияти онҳо тариқи расона ё Интернет (моддаи 307, иловаи 3, қисми 2-и Кодекси ҷиноӣ) гумонзад медонанд ва ба ҷустуҷӯ додаанд.
Ин банди қонун аз панҷ то ҳашт сол зиндонро дар назар дорад, вале тибқи эзоҳе, ки ба Кодекси ҷиноӣ илова шудааст, имкони аз ҷавобгарии ҷиноӣ раҳо шудан вуҷуд дорад. "Агар шахс ихтиёрӣ аз ҳамкорӣ бо созмонҳои мамнуъ даст кашад ва дар кирдори ӯ таркиби ҷинояти дигар мавҷуд набошад", – ишора шудааст дар қонун.
Муллоиди Мирзоолимзода рӯзи 4-уми апрел дар сӯҳбат бо Радиои Озодӣ гуфт, иттиҳоми эълоншударо дар Тоҷикистон намепазирад. Ӯ ҳамзамон шикоят кард, ки маъмурони амниятӣ чанд рӯз қабл ба модару хоҳараш фишор овардаанд, то вайро ба Тоҷикистон баргардонанд.
Мирзоолимзода гуфт, як сол пеш мақомоти амниятии вилояти Суғд нусхаи аризаро барои ибрози пушаймонӣ ва дархости озодӣ аз ҷавобгарӣ ба ӯ фиристода буданд, аммо ӯ рад кард, чун худро бегуноҳ медонад.
"Ҳамин аризаро бори дигар ба наздиконам дода, гуфтаанд, маро ба бозгашт ба ватан маҷбур кунанд. Ман гуфтам, бовар надорам ва қасди бозгашт ба Тоҷикистонро надорам",–нақл кард ӯ.
Шарҳи расмии мақомот феълан дастрас нест.
Муллоиди Мирзоолимзода соҳиби се фарзанд аст ва хатмкардаи риштаи сиёсатшиносии Донишгоҳи байнулмилалии шаҳри Қазвини Эрон.
Падараш, Мирзоолим Холов, раиси пешини бахши Ҳизби наҳзати исломӣ дар ноҳияи Кӯҳистони Мастчоҳ, дар соли 2015 дастгир ва 16 сол зиндонӣ карда шудааст.
Аз соли 2015 ба ин сӯ гурӯҳе аз шаҳрвандони Тоҷикистон ба далели мухолифат бо режими ҳоким ва ё таъқибу азияти афзун, дар Аврупо паноҳанда шуданд. То кунун чанд мавриди ихроҷ ва дар Тоҷикистон зиндонӣ шудани баъзе аз паноҳҷӯён расонаӣ гардидааст.
Фаррух Икромов, паноҳҷӯйи тоҷик, ки моҳи апрели соли 2024 аз Лаҳистон ронда шуд, дар Душанбе ба 23 сол зиндон маҳкум гашт. Ӯ аз соли 2016 бо ҳамсар ва ду фарзандаш дар Полша мезист. Мухолифони ҳукумат пеш аз фиристодани Фаррух Икромов ба Тоҷикистон гуфта буданд, ки ӯ дар эътирозҳои соли 2023 ба зидди президент Эмомалӣ Раҳмон дар Берлин ширкат дошт.
Мақомоти Олмон дар моҳи ноябри соли 2023 Билол Қурбоналиев, узви боздоштшудаи "Гурӯҳи 24"-ро ба Душанбе истирдод карданд. Қурбоналиев барои нақзи қоидаҳои иқомат дар Олмон дастгир шуда буд. Додгоҳи ноҳияи Исмоили Сомонии шаҳри Душанбе ӯро даҳ ҳол аз озодӣ маҳрум кард.
Ҳизбулло Шовализода, як узви ҳизби дар Тоҷикистон мамнӯи наҳзати исломӣ, соли 2020 аз Австрия ба Тоҷикистон истирдод ва ба 20 сол зиндон маҳкум шуд.
Мақомоти Олмон дар моҳи январи 2023 Абдуллоҳи Шамсиддин, писари яке аз фаъолони ҳизби дар Тоҷикистон мамнӯи наҳзати исломиро ба Душанбе фиристоданд. Ба хабари Дидбони Ҳуқуқи Башар, ӯ ба ҳафт сол зиндон маҳкум шудааст.
Гуфтугӯ