Ин бозӣ, ки шаби панҷшанбеи 5-уми сентябр дар маҷмааи варзишии «Кохи Олимп»-и Душанбе баргузор шуд, бо ҳисоби бузурги 9:2 ба фоидаи футзалбозони Испания анҷом ёфт.
Сатҳи бозии испаниҳо хеле боло буд. Онҳо зери раҳбарии сармураббӣ Феде Видал дар нимаи аввали дидор ба дарвозаи мизбонон се голи беҷавоб заданд. Дар нимаи дувуми бозӣ меҳмонон боз шаш гол ва футзалбозони тоҷик ду гол ба самар расонданд. Дар ҳайати мунтахаби Тоҷикистон як гол ба Самандар Ризомов марбут аст, як голи дигарро испаниҳо ба дарвозаи худ заданд.
Дар Душанбе бозиҳои дӯстона бо ширкати тимҳои миллии футзали Тоҷикистон, Испания ва Нидерланд дар доираи омодагиҳои ин дастаҳо ба мусобиқоти қаҳрамонии ҷаҳон-2024 сурат гирифтааст.
Рӯзи шанбеи 7-уми сентябр бозии дӯстона миёни дастаҳои мунтахаби Испания ва Нидерланд барпо мегардад.
Силсилаи бозиҳои дӯстона бо рақобати тимҳои миллии Тоҷикистону Нидерланд рӯзи якшанбеи 8-уми сентябр ба поён мерасад. Ҳарду бозӣ дар маҷмааи варзишии “Кохи Олимп” соати 20:00 оғоз меёбад.
Дар як нишасти матбуотӣ сармураббии тими миллии Тоҷикистон Пайрав Воҳидов гуфт, ки бозиҳои дӯстона бо дастаҳои мунтахаби қавии Испания ва Нидерланд пеш аз Ҷоми ҷаҳон-2024 хеле муфид хоҳад буд.
Бозиҳои дӯстонаи дастаҳои мунтахаб дар Душанбе
5-уми сентябр (панҷшанбе)
Тоҷикистон – Испания – 2:9
Душанбе, маҷмааи варзишии «Кохи Олимп»
7-уми сентябр (шанбе)
Оғози бозӣ – соати 20:00
Испания – Нидерланд
Душанбе, маҷмааи варзишии
«Кохи Олимп»
8-уми сентябр (якшанбе)
Оғози бозӣ – соати 20:00
Тоҷикистон – Нидерланд
Душанбе, маҷмааи варзишии «Кохи Олимп»
Ёдовар мешавем, даҳумин мусобиқаи қаҳрамонии ҷаҳон оид ба футзал аз 14-уми сентябр то 6-уми октябри имсол дар се шаҳри Узбекистон - Тошканд, Бухоро ва Андиҷон – баргузор мешавад.
Мунтахаби Тоҷикистон дар марҳилаи гурӯҳии Ҷоми ҷаҳон-2024 дар гурӯҳи «Е» бо дастаҳои яккачини Марокаш (16-уми сентябр), Португалия (19-уми сентябр) ва Панама (22-юми сентябр) бозӣ мекунад.
