Оҷонси паноҳандагони Иттиҳоди Аврупо рӯзи сешанбеи 4-уми июл эълон кард, ки дар соли 2022 ҳудуди як миллион нафар дар кишварҳои узви ин иттиҳод дархости паноҳандагӣ кардаанд ва шумори дархостҳо дар Олмон беш аз дигар кишварҳо будааст. Ба гуфтаи ин ниҳод, ин шумори дархостҳои паноҳандагӣ дар кишварҳои Иттиҳоди Аврупо ва ҳампаймонҳои ин иттиҳодия ба шумули Шветсия, Норвегия ва Исландия дар муқоиса бо соли 2021 панҷоҳ дарсад зиёд будааст.
Аз ин шумори дархостҳо ҳудуди 244 ҳазор ба Олмон, 152 ҳазор ба Фаронса, 118 ҳазор ба Испания, 109 ҳазор ба Австрия ва 88 ҳазор ба Италия рост меояд. Дар умум, 996 ҳазор дархости паноҳандагӣ дар соли 2022 дар Иттиҳоди Аврупо сабт шудааст.
Бо вуҷуди афзоиши чашмраси 50-дарсадӣ дар шумори дархостҳои паноҳандагӣ дар соли 2022, ин рақам ҳамчунон камтар аз рекордҳои сабтшуда дар соли 2015 (ҳудуди 1,4 миллион) ва соли 2016 (ҳудуди 1,3 миллион) аст.
Оморҳои нави Оҷонси паноҳандагони Иттиҳоди Аврупо нишон медиҳад, ки аз соли 2008, ки оморҳои саросарии Аврупо сабт шудааст, шумори дархостҳои паноҳандагӣ дар бархе аз кишварҳои узви ин иттиҳодия, аз ҷумла, Австрия, Фаронса, Испания ва Португалия дар соли 2022 ба болотарин рақам расидааст.
Аз миёни як миллион нафаре, ки хоҳони дарёфти паноҳандагӣ дар Аврупо будаанд, бештарин шумори дархостҳо аз тарафи шаҳрвандони Сурия, Афғонистон, Туркия, Венесуэла ва Колумбия будааст.
Гузориши Оҷонси паноҳандагони Иттиҳоди Аврупо мегӯяд, "шуморе аз буҳронҳо, аз ҷумла, даргириҳои низомии нав ва давомдор, бесуботии сиёсӣ, хушунат ва саркӯб ва тағйирёбии иқлим ҳама дар якҷоягӣ боис шудааст, ки миллионҳо нафар дар соли 2022 сарзамини худро тарк кунанд".
Ҳудуди 42 ҳазор нафар аз талабгорони паноҳандагӣ дар соли 2022 кӯдакон ва навҷавононе ҳастанд, ки бе волидони худ ба хоки Аврупо расидаанд. Ин баландтарин рақам аз соли 2016 то кунун аст ва аз се ду ҳиссаи онҳо аз Афғонистон ва Сурия мебошанд.
Омори талабгорони паноҳандагӣ дар соли 2022, шомили ҳудуди чаҳор миллион паноҳҷӯи украинӣ намешавад, ки бинобар шароити истисноӣ ва тасмими Иттиҳоди Аврупо, аз раванди идорӣ ва тӯлонии дархости паноҳандагӣ, озод шудаанд.
Оҷонси паноҳандагони Иттиҳоди Аврупо дар бахши дигаре аз гузориши солонаи худ меафзояд, "ҳамлаи низомии Русия ба Украина ба яке аз калонтарин буҳронҳои паноҳҷӯӣ аз поёни Ҷанги Дувуми Ҷаҳонӣ то кунун сабаб шуд".
Ин оҷонс хотирнишон мекунад, ки дар соли 2022 дар умум ҳудуди панҷ миллион нафар ба кишварҳои Иттиҳоди Аврупо паноҳ бурдаанд.
Гузориши Оҷонси паноҳандагони Иттиҳоди Аврупо камтар аз як моҳ пас аз он нашр мешавад, ки як киштии моҳигирии ҳомили садҳо паноҳҷӯ ба тарафи Аврупо дар обҳои Баҳри Миёназамин дар наздикии Юнон ғарқ шуд, ки аксари киштинишастаҳо шаҳрвандони Покистон буданд.
Танҳо 104 нафари сарнишинҳои ин киштӣ наҷот ёфтанд ва тибқи оморҳое, ки ҳукумати Юнон он замон нашр кард, танҳо ҷасади 82 қурбонӣ пайдо шуда буд.
Ҳамзамон тибқи гузоришҳо, нерӯҳои марзии Юнон бар хилофи қонун, қаиқҳои паноҳҷӯёнро барқасдона аз хоки ин кишвар дур мекунанд. Юнон аввалин мақсади аврупоии паноҳҷӯёне аст, ки талош мекунанд худро бо қаиқ аз Туркия ё Шимоли Африқо ба хоки Аврупо бирасонанд.
Гуфтугӯ