Мақомоти курд дар Сурия мегӯянд, аъзои хориҷии ДОИШ-ро баъд аз солҳо боздошту нигаҳдорӣ муҳокима хоҳанд кард. Гап дар бораи беш аз даҳ ҳазор нафар меравад, ки мумкин аст дар байнашон тоҷикон низ бошанд.
Мақомоти курд дар шимоли шарқи Сурия ба муҳокимаи ҷангҷӯёни ДОИШ, гуруҳи террористии “Давлати исломӣ”, омода мешаванд. Онҳо чанд сол боз дар боздошт ҳастанд ва ба ҷинояти ҷангӣ ва ҷиноят алайҳи башарият муттаҳаманд.
Нерӯҳои курд зиёда аз даҳ ҳазор ҷангҷӯйро дар соли 2019 ҳангоми шикаст додани гурӯҳи "Давлати исломӣ" бо пуштибонии Амрико ва қувваҳои байнулмилалӣ боздошт кардаанд.
Мақомоти маҳаллӣ мегӯянд, муҳокимаи ҷангҷӯён барои он дар Сурия мегузарад, ки кишварҳои аслияшон онҳоро суроғ накарданд ва бозпас нагирифтанд. Дар ҳоле ки, ба гуфтаи нерӯҳои курд, ҷангҷӯёнро наметавон ба таври доимӣ дар боздошт нигоҳ дошт.
Гузориши видеоиро дар инҷо тамошо кунед:
Ҳуқуқдон Холид Умар мегӯяд, "бино ба қонунҳои байнулмилалии ҳуқуқи башар, ин одамон ҳақ доранд, ки муҳокима шаванд. Онҳо дигар наметавонанд бидуни мурофиа дар боздоштгоҳ бимонанд. Додгоҳ бояд ҷиноят ва ҷазои онҳоро муайян кунад.”
Маъмурияти зери раҳбарии курдҳо аз ҷониби ҳеч тарафе дар дохил ва беруни Сурия ба расмият шинохта нашудааст ва ин дарёфти пуштибонии байнулмилалиро барои муҳокимаи ҷангҷӯён душвор мегардонад.
Бо вуҷуди ин, мақомоти курд мегӯянд, тасмимашон ба баргузории мурофиаи аъзои “Давлати исломӣ” ҷиддист. Ба гуфтаи коршиносон, созмонҳои байнулмилалии ҳуқуқи башар метавонанд дар ин кор саҳм гиранд.
Валид Чолӣ, аз Маркази таҳқиқотии “Ал-Фурот” таъкид мекунад, ки “ҷомеаи байнулмилалӣ, бахусус созмонҳои ҳуқуқи башар, бояд ба баргузории ин мурофиаҳо мадад кунанд. Дар асл, Созмони Милали Муттаҳид бояд чунин талошҳои кӯмак ба баргузории мурофиаҳоро сарварӣ намояд."
Мақомот мегӯянд, азбаски аъзои ДОИШ дар содир кардани ҷиноят алайҳи мардуми Сурия муттаҳам ҳастанд, муҳокимаи онҳо дар инҷо аҳамият дорад. Сокинони маҳаллӣ низ ин ақидаро дастгирӣ мекунанд.
Амира Ҳисо, сокини маҳаллӣ мегӯяд, "онҳо дар инҷо одам куштанд. Мо мехоҳем, мурофиаашон дар ҳамин ҷо гузарад. Онҳо дар инҷо ҷиноят карданд”.
Абдуссалом Абдо, сокини маҳаллӣ ҳам афзуд “мо ба таври қатъӣ ин мурофиаҳоро пуштибонӣ мекунем. Ҳамзамон умед дорем, ки ҷомеаи ҷаҳонӣ барои додгоҳ кашида шудани ин одамон ба мо ёрӣ медиҳанд."
Дар ҳоле ки баъзе аз мурофиаҳо дар роҳанд, маълум нест, ки натиҷаҳояшро ягон ниҳоди байнулмилалӣ ё ҳукуматҳо эътироф хоҳанд кард ё не.
Гурӯҳи тундрави "Давлати исломӣ" дар соли 2014 минтақаҳои калонеро дар Ироқ ва Сурия тасарруф кард ва раҳбари пешина Абубакр Ал-Бағдодӣ худро "халифа" номиду "ҳукумати исломӣ" эълон кард.
Дар пайи ҳамлаҳои нерӯҳои таҳти ҳимояти Амрико дар Ироқу Сурия ва ҳамчунин нерӯҳои зери ҳимояти Эрон ва Русия дар Сурия, ДОИШ назорати худро бар ин минтақаҳо аз даст дод.
Бо ин ҳол, гуфта мешавад, ки ҳанӯз ҳазорон нафар аз боқимондаҳои ин гурӯҳ дар минтақаҳои дурафтодаи Сурия ва Ироқ пинҳон шудаанд ва ҳамчунон қодир ба анҷоми ҳамлаҳои ногаҳонӣ ҳастанд.
Нерӯҳои эътилоф зери раҳбарии Амрико ҳамроҳ бо нерӯҳои курд ба муборизаи худ алайҳи ДОИШ дар Сурия идома медиҳанд.
Гуфтугӯ