Владимир Путин, раиси ҷумҳури Русия рӯзи душанбеи 26 июн дар нахустин изҳороти телевизионии худ пас аз поёни "ошӯби мусаллаҳона"-и ниманизомиёни ширкати муздури "Вагнер" таъкид кард, ки ташкилкунандагони ин шӯриш муҳокима хоҳанд шуд. Раиси ҷумҳури Русия ҳамчунин аз аксари аъзои гурӯҳи "Вагнер" ташаккур кард, ки "нагузоштанд вазъ бадтар ва дар кишвар хунрезӣ шавад".
Ӯ ба ҷангҷӯёни "Вагнер" пешниҳод кард, ки се интихоб доранд - ё ба хонаҳояшон баргарданд, ё ба Белорус бираванд ё бо Вазорати дифои Русия қарордод банданд. Владимир Путин дар идомаи ин изҳороти телевизионии худ "душманони Русия"-ро сабабгори ин "ошӯби мусаллаҳона" донист ва гуфт, ки онҳо "дар ҳисобҳои худ хато карданд".
Гурӯҳи муздурони "Вагнер", ки то пеш аз ин аз тарафи Русия бо Украина меҷангиданд, субҳи шанбе бо пешравӣ дар хоки Русия, шаҳри Ростовро тасарруф кард. Аммо раиси ин гурӯҳ субҳи якшанбе эълон кард, ки бо миёнаравии раиси ҷумҳури Белорус ба ин кишвар меравад ва нерӯҳои ин гурӯҳ пешравӣ ба тарафи Маскавро поён доданд.
Ҳамзамон, Евгений Пригожин, раиси гурӯҳи муздури "Вагнер" рӯзи душанбе дар як паёми савтӣ аз "ошӯби мусаллаҳона"-и худ ҳимоят кард, вале гуфт, ки ҳадаф эълони норизоятӣ ва эътироз буд, на сарнагун кардани ҳукумат.
Ошӯб "як иқдоми ҷинояткорона" буд.
Владимир Путин ҳамчунин изҳор дошт, "ташкилкунандагони ин ошӯб наметавонанд дарк кунанд, ки онҳо ба панҷаи қонун супурда хоҳанд шуд. Ҳама инро медонанд. Ин ошӯб амали ҷинояткорона буд, ки ба ҳадафи заъиф сохтани Русия сурат гирифт ва ин як таҳдиди бузург барои мо буд".
Раиси ҷумҳури Русия дар идома таъкид кард, ки "ҳаргуна боҷ хостан ва ошӯб" дар кишвар ба шикаст рӯбарӯ мешавад. Ӯ ҳамчунин "ошӯби мусаллаҳона"-и гурӯҳи "Вагнер"-ро амали интиҳорӣ хонд, ки ба нафъи Украина ва тарафдорони ғарбии он буд.
Ӯ гуфт, "онҳо мехостанд сарбозони рус якдигарро бикушанд, нерӯҳои низомӣ ва ғайринизомиён кушта шаванд ва дар ниҳоят, Русия шикаст бихӯрад".
Ин дар ҳоле аст, ки Евгений Прогожин дар паёми нави худ дар бораи ошӯби мусаллаҳонаи рӯзи шанбе гуфт, "ҳадафи мо эълони норизоятӣ ва эътироз буд, на сарнагун кардани ҳукумати марказӣ".
Раиси гурӯҳи "Вагнер" дар ин паём таъкид кард, ки нерӯҳои ӯ дар ҷараёни пешравӣ дар хоки Русия нишон доданд, ки артиши Русия ба чӣ ниёз дорад ва ҳамла ба Украина бояд ин тавр иҷро шавад.
Бо вуҷуди паёми нави Евгений Прогожин дар рӯзи душанбе, ҳанӯз ҷойи зиндагии ӯ дар Белорус маълум нест. Дар ҳамин ҳол, як канали хабарии пуртарафдор дар шабакаи "Телеграм" иддао кард, ки раиси гурӯҳи "Вагнер" дар меҳмонхонае дар шаҳри Минск, пойтахти Белорус дида шудааст.
Як хабаргузории мустақили русӣ ҳам иддао кардааст, ки бунёди як пойгоҳ барои тақрибан 8 ҳазор сарбози "Вагнер" дар минтақае аз Белорус дар ҳудуди 200-километрии шимоли марз бо Украина, дар ҳоли анҷом аст. Ин хабар ба таври расмӣ таъйид нашудааст.
Гуфтугӯ