Оҷонси паноҳандагони Созмони Милали Муттаҳид эълон кард, ки афзоиши ҷангҳо дар ҷаҳон, гуруснагӣ ва тағйироти обу ҳаво боис шуд, ки омори оворагон дар соли 2022 ба таври рекордӣ бештар шавад. Гузориш рӯзи 21-уми июн нашр шуд.
Филиппо Гранди, Комиссари олии Созмони Милал дар умури паноҳандагон, гуфт, "110 миллион нафар аз хонаҳои худ гурехтаанд.” Ба қавли ӯ, “аз се ду ҳиссаи онҳо дар дохили кишвари худ монданд ва як ҳиссаи онҳо ба кишварҳои дигар рафтанд".
Гузориши Оҷонси паноҳандагони СММ нишон медиҳад, ки аз чор се ҳиссаи паноҳандагоне, ки аз кишварҳои худ дар соли гузашта гурехтаанд, ба кишварҳое бо даромади кам ё миёна рафтаанд.
Гранди бо такя ба ин омор гуфт, “ин тасаввури хатое аст, ки ҳамаи паноҳандагон ба кишварҳои сарватманди Аврупо ё Амрикои Шимолӣ мераванд".
Бино ба омори Оҷонси паноҳандагони Созмони Милал, то поёни соли 2022 шумораи афроди овора ба 108,4 миллион нафар расид. Ин рақам нисбат ба соле қабл 19,1 миллион нафар бештар аст.
Ин ниҳод ҳушдор додааст, ки ҳеч нишонае барои поён додан ба раванди рӯ ба рушди омори оворагон дар соли 2023 вуҷуд надорад, зеро бо сар задани ҷанги Судон, шумори оворагон дар моҳи май ба 110 миллион нафар расид.
Тибқи ин гузориш, Туркия дар соли 2022 бештар паноҳанда ва афроди ниёзмандро пазируфт (3,6 миллион нафар) ва пас аз он Эрон ва Колумбия баландтарин оморро аз ин нигоҳ доранд. Олмон низ бо пазириши 2,1 миллион паноҳанда дар ҷойи чаҳорум қарор дорад.
Вазири рушди Олмон гуфт, "аз байни ҳама кишварҳои ҷаҳон, ин фақиртарин кишварҳо ҳастанд, ки бештарин тамоюлро барои қабули паноҳандагон нишон медиҳанд ва бештарин борро ба дӯш мекашанд".
Вай афзуд, аз ин рӯ, бояд бо кишварҳои мизбон эълони ҳамбастагӣ кард ва ҳукумати Олмон дар ин росто аз соли 2014 то кунун 300 тарҳро дар 78 кишвар барои ҳимоят аз паноҳҷӯён амалӣ кардааст.
Теъдоди бештари паноҳҷӯён аз Сурия омадаанд, ки 6,5 миллион нафар ҳастанд ва пас аз он низ Украина ва Афғонистон қарор доранд, ки аз ҳар ду кишвар 5,7-миллион нафарӣ гурехтаанд.
Гуфтугӯ