Kuvendi dështon të zgjedhë Haxhiun si kryeparlamentare, Kuvendi shkon në pauzë
Me 57 vota për, 20 kundër dhe 3 abstenime, Albulena Haxhiu nuk arriti të zgjidhej kryetare e re e Kuvendit të Kosovës.
Në votimin për kandidaten e LVV-së për kryeparlamentare, tre deputetët e Nismës abstenuan, ata të PDK-së, LDK-së dhe AAK-së nuk morën pjesë në votim.
Pas dështimit të zgjedhjes së Haxhiut, kryesuesi i seancës, Avni Dehari, njoftoi për një pauzë të punimeve plenare.
Krasniqi: Procesi ishte bllokuar sepse po shihet se VV-ja s’i ka numrat
Kreu i Partisë Demokratike të Kosovës, Memli Krasniqi, tha se bllokimi i seancës konstituive të Kuvendit të Kosovës që nga 15 prilli është për shkak se Lëvizja Vetëvendosje nuk i ka numrat për ta formuar qeverinë.
“Ishin 52, qenkan bërë 57, nuk besoj që do të bëhen 61”, tha Krasniqi.
Për zgjedhjen e kryeparlamentarit të ri dhe formimit të qeverisë duhet 61 vota.
Ai tha se partia e tij votoi për raportin e mandatit të deputetëve sepse në procesverbal është përfshirë deklarata se kabineti qeveritar kanë dhënë dorëheqje individuale.
Bajrami: LDK do të ngrehë kallëzim penal ndaj anëtarëve të Qeverisë
Hykmete Bajrami, shefe e Grupit Parlamentar të LDK-së, tha se partia e saj do të bëjë kallëzim penal ndaj anëtarëve të Qeverisë, që janë zgjedhur deputetë dhe të cilët bënë sot betimin, për ushtrim të funksioneve ekzekutive.
Ajo tha se neni 70 i Kushtetutës thotë “qartë se mandati i deputetit nis me datën e certifikimit të rezultateve”.
Sipas saj, që nga 27 marsi – kur është certifikuar rezultati zgjedhor – anëtarët e Qeverisë – të betuar tashmë si deputetë – kanë bërë shkelje, duke mbajtur postin ekzekutiv.
“Pastaj do të shohim hapat për Gjykatën Kushtetuese”, tha ajo.
Sa i përket kryeparlamentarit, Bajrami tha se LDK nuk ka asnjë kandidat të pranueshëm për këtë post nga LVV-ja.
Peci: Do t’i kemi numrat për qeverinë, negociatat vazhdojnë
Faton Peci, nga Lëvizja Vetëvendosje, tha LVV-ja do t’i sigurojë 61 votat e nevojshme për formimin e qeverisë së re.
Ai tha se negociatat për këtë do të vazhdojnë, njëjtë si diskutimet për të vendosur nëse Albulena Haxhiu do të propozohet sërish për postin e kryeparlamentares apo dikush tjetër.
“Nuk pranojmë imponime nga jashtë”, tha ai, pak pasi kreu i AAK-së, Ramush Haradinaj, tha se ata do të votonin pro Saranda Bogujevcit dhe Shqipe Selimit për postin e kryeparlamentares.
Peci gjithashtu shtoi se nuk ka pasur dorëheqje të reja dhe se ai do të vazhdojë ta kryejë detyrën e ministrit të Bujqësisë deri të formohet një qeveri e re.
