Haxhiu: Kemi dakordim për votimin e raportit për mandate
Albulena Haxhiu nga LVV tha se të gjitha partitë politike u dakorduan gjatë takimit konsultativ, me kryesuesin Avni Dehari, që raporti i Komision për verifikimin e mandateve të votohet në mënyrë unanime, në mënyrë që të ecet përpara.
Haxhiu tha se vetëm nëse të gjithë votojnë për raportin e Komsionit të përkohshëm për verifikimin e mandateve, si në Komision por edhe në sallë plenare, edhe LVV-ja do ta mbështesë atë.
Ajo tha se asnjë veprim tjetër nuk e kanë bërë sa i përket dorëheqjeve nga postet ekzekutive, duke përsëritur qëndrimin se dorëheqjet janë dorëzuar më herët te kryeministri.
Haxhiu. megjithatë tha se nëse nuk konstituohet Kuvendi, partia e saj është e hapur edhe për mbajtjen e zgjedhjeve të reja.
Kusari-Lila: Kërkojmë unanimitet që të mos kontestohet pastaj votimi në Kushtetuese
Mimoza Kusari Lila ka thënë se deputetët e zgjedhur nga Lëvizja Vetëvendosje do të votojnë pro raportit për verifikimin e mandateve të deputetëve vetëm nëse një gjë e tillë bëhen unanimisht.
Kjo pasi që ajo tha se nuk dëshiron që partitë e tjera pastaj ta shfrytëzojnë rastin që ta kontestojnë votimin duke e dërguar atë në Gjykatën Kushtetuese.
“Nuk është në peshën tonë për t’u siguruar që ai rapport të kalojë. Kushtetuta e parasheh që mandati i deputetit është i pavlefshëm nëse nuk e bëhen betimin”, tha Kusari-Lila.
Ajo sqaroi se tani kryesuesi i seancës do të kërkojë miratimin e të gjithë deputetëve në sallë për kthimin në zero të procesit, pra të krijohet një komision i ri për verifikim të mandateve dhe pastaj të miratohet raporti në komision e në Kuvend.
120 deputetë të pranishëm, nis seanca konsituive
Tashmë ka filluar vazhdimi i seancës konstituive, që fillimisht kishte nisur të martën, me 120 deputetë të pranishëm.
Kryesuesi i seancës, Avni Dehari, tha se në takimin konsultativ me përfaqësues të partive politike janë pajtuar që me votë unanime të votohet raporti në Komision dhe pastaj në seancë.
“Është propozuar po ashtu që të autorizohet komisioni i përkohshëm, i njëjti, ose nëse nuk pajtoheni që të jetë i njëjti komision, duhet të zgjidhen anëtarë të rinj që do të përpilojnë raportin e ri”, tha Dehari.
