Haxhiu dështon të zgjidhet kryeparlamentare, seanca vazhdon të hënën

Ministri në detyrë i Financave, Hekuran Murati, para nisjes së seancës konstituive, tha se raporti për verifikimin e mandateve, nuk mund të hedhet sërish për votim, pasi herën e parë, më 15 prill “ai u refuzua si rezultat i votave të PDK, LDK, AAK, dhe Listës Serbe”. Sipas tij, kjo i bie se "deputetët kanë refuzuar mandatin, dhe procesi duhet të kthehet në pikën zero - pra një proces i ri zgjedhor i cili prodhon një legjislaturë të re e cila, ka sensin që të pranojë mandatin e dhënë nga populli".

“E vetmja rrugë tjetër për të evituar skenarin e zgjedhjeve të reja, është një dakordim unanim politik, ku vetëm deputetët që kanë refuzuar mandatin me votën e tyre, tërhiqen dhe ua lëshojnë vendin e tyre kolegëve tjerë nga i njëjti subjekt. Një gjë e ngjashme kishte ndodhur në legjislaturën që lamë pas me deputetët e Listës Serbe”, shkroi ai në Facebook.

Përfaqësues të Institutit Demokratik të Kosovës (IKD) dorëzuan në Kuvendin e Kosovës një model se si mund të dukej një dorëheqje formale e një ministri në detyrë apo e kryeministrit në detyrë të Qeverisë së Kosovës.

Fatmir Limaj, kryetar i Nismës Socialdemokrate, tha se ai shpreson që raporti për mandatin e deputetëve do të votohet nga deputetët.

“Secili deputet duhet ta kryejë detyrën e vet, po besoj që deputetët duhet ta votojnë veten e tyre”, tha Limaj.

Ai s’pranoi të komentojë nëse ka marrëveshje për bashkëqeverisje me Lëvizjen Vetëvendosje.

Deputeti i zgjedhur i LDK-së, Arben Gashi, tha se zgjidhja për bllokimin e Kuvendit është të votohet një raport i ri për verifikimin e mandateve, duke thënë se beson që çështja zgjidhet sot.

“Ai raporti i parë është rrëzuar. Ai raport nuk mund të votohet sërish”, tha ai.

I pyetur nëse presidentja Vjosa Osmani mund të ndihmojë në tejkalimin e situatës, ai tha:

“Nuk mundet të bëjë asgjë. Është jashtë kompetencat e saj, është çështje politike e Kuvendit të Kosovës”.