Haxhiu: Kemi dakordim për votimin e raportit për mandate
Albulena Haxhiu nga LVV tha se të gjitha partitë politike u dakorduan gjatë takimit konsultativ, me kryesuesin Avni Dehari, që raporti i Komision për verifikimin e mandateve të votohet në mënyrë unanime, në mënyrë që të ecet përpara.
Haxhiu tha se vetëm nëse të gjithë votojnë për raportin e Komsionit të përkohshëm për verifikimin e mandateve, si në Komision por edhe në sallë plenare, edhe LVV-ja do ta mbështesë atë.
Ajo tha se asnjë veprim tjetër nuk e kanë bërë sa i përket dorëheqjeve nga postet ekzekutive, duke përsëritur qëndrimin se dorëheqjet janë dorëzuar më herët te kryeministri.
Haxhiu. megjithatë tha se nëse nuk konstituohet Kuvendi, partia e saj është e hapur edhe për mbajtjen e zgjedhjeve të reja.
Haradinaj: Opozita do që procesi i konstituimit të Kuvendit të ecë përpara
Kryetari i Aleancës për Ardhmërinë e Kosovës (AAK), Ramush Haradinaj, tha se nuk mund të garantojë që partitë që kanë qenë deri më tani në opozitë do të votojnë pro raportit të ri për mandatin e deputetëve.
“Por, ekziston mundësia që opozita ta mbështesë ecjen përpara të procesit. Qëllimi i opozitës është të mos e pengojë ecjen përpara të konsituimit të Kuvendit”, tha Haradinaj.
Raporti i parë për mandatet e deputetëve nuk kishte siguruar vota të mjaftueshme në Kuvend. Tani është bërë e ditur se do të formohet një komision i ri për verifikimin e mandateve të deputetëve të zgjedhur.
Berisha: Do ta votoj raportin për mandatet
Veton Berisha nga Partia Liberale Egjiptiane tha se nuk është për bllokimin e institucioneve të Kosovës.
Ai tha se do të votojë për raportin për mandatet e zgjedhjen e kryeparlamentarit.
“Kur flasim për pjesë të tjera, nuk kemi asnjë marrëveshje deri tash”, tha ai duke iu referuar votimit të Qeverisë së re.
Kadrijaj: Do të formohet komision i ri për verifikim të mandateve
Time Kadrijaj, nga Aleanca për Ardhmërinë e Kosovës (AAK), tha se sot do të formohet komision i ri për verifikimin e mandateve të deputëve.
Këtë deklaratë ajo e dha pasi mori pjesë në takimin e ftuar nga kryesuesi i seancës, Avni Dehari, me përfaqësues të partive politike.
Një komision i tillë ishte formuar edhe në seancën e parë konsituive të martën, por raporti nuk kishte marrë votat e mjaftueshme për të kaluar në Kuvend.
