S’ka konstituim të Kuvendit as në përpjekjen e gjashtë

Deputeti i Lidhjes Demokratike të Kosovës, Armend Zemaj, e ka përsëritur se partia e tij nuk do ta votojë kandidaten e Lëvizjes Vetëvendosje për kryetare të Kuvendit, Albulena Haxhiu.

“Sigurisht që do të votojmë kundër. Lëvizja Vetëvendosje e ka sjellë vendin në këtë situatë duke u sjellë sikur një parti e cila e ka fituar e vetme vullnetin e qytetarëve të Kosovës”, tha ai.

I pyetur nëse LDK-ja ka vullnet për kandidat konsensual, ai tha se “nuk mund të ketë kandidat konsensual derisa arroganca dhe mënyra sesi bën politikë [Vetëvendosje] ose si tenton kapjen e institucioneve... konsensuesi për ndonjë emër të përveç është i pamundur”.

Kreu i Nismës Socialdemokrate, Fatmir Limaj, tha se partia e tij nuk ka ndryshuar qëndrim nga herat e kaluara dhe se as në seancën e sotshme konsituive nuk do ta përkrahë propozimin që Albulena Haxhiu të bëhet kryeparlamentarja e re e Kuvendit të Kosovës.

“Qëndrimi dhe votimi është ashtu siç ka qenë edhe herën e kaluar”, tha Limaj.

Deputetja nga Lëvizja Vetëvendosje, Donika Gërvalla, tha se nuk është optimiste që sot do të votohet Albulena Haxhiu si kryeparlamentarja e re e Kuvendit të Kosovës, edhe pse shtoi se shpreson të bëhet një gjë e tillë.

“Beteja bëhet për formimin e qeverisë. Nuk është çështje e lëshimit pe, është çështje parimore. Fituesi e propozon kryeparlamentarin”, tha Gërvalla.

Ajo shtoi se, sipas saj, asnjë parti nuk ka asnjë arsye ta refuzojë Haxhiun për këtë post, duke përmendur se ajo është gruaja më e votuar në zgjedhjet e 9 shkurtit.

“Ky është arsyetim i rremë, arsyetimi i vërtetë është se nuk duan ta pranojnë vullnetin e qytetarëve të fatën 9 shkurt”, tha Gërvalla.

Deputetët kanë filluar t'i zënë vendet e tyre në sallën e Kuvendit, për vazhdimin e gjashtë të seancës konstituive.

Seanca pritej të fillonte në orën 10:00.

Ata do të tentojnë t'i emërojnë kryetarin dhe nënkryetarët e Kuvendit, në mënyrë që ta përmbyllin konstituimin e Kuvendit.