Përshëndetje të nderuar lexues,
Mirë se vini në mbulimin e drejtpërdrejtë të vazhdimit të seancës konstituive të Kuvendit të Kosovës, e nisur më 15 prill.
Ekipi i Radios Evropa e Lirë do t’ju sjellë në kohë reale zhvillimet lidhur me tentimin e gjashtë për konstituimin e legjislaturës së nëntë.
Çfarë pritet të ndodhë në seancën e sotme?
Në seancën e sotme, deputetët duhet t’i zgjedhin kryetarin dhe nënkryetarët në mënyrë që ta konstituojnë Kuvendin e Kosovës përfundimisht.
Lëvizja Vetëvendosje pritet ta propozojë përsëri Albulena Haxhiun për kryetare të Kuvendit, por nuk është e qartë nëse i ka votat e nevojshme.
Haxhiu dështoi të emërohej në tri tentimet e kaluara, pasi secilën herë i mori vetëm 57 vota nga 61 të nevojshme.
Seanca konstituive, sipas rregullores së Kuvendit, përfundon me zgjedhjen e tyre e kryetarit dhe nënkryetarëve.
Në rast se Kuvendi konstituohet sot në përpjekjen e gjashtë, atëherë do të hapet rruga për formimin e Qeverisë së re.
Vetëvendosje nuk heq dorë nga kandidatura e Haxhiut
Lëvizja Vetëvendosje nuk ka hequr dorë nga emri i Albulena Haxhiut, si e propozuar për kryetare të Kuvendit të Kosovës.
“Nuk ka ndërruar emri”, tha në një përgjigje për Radion Evropa e Lirë, kryesuesi i seancës konstituive Avni Dehari, një natë para vazhdimit të seancës.
Dehari po ashtu tha mbrëmjen e së enjtes se nuk ka thirrur asnjë takim konsultativ me partitë politike para vazhdimit të seancës konstituive.
“Jo, e kemi kryer takimin konsultativ, tash do të vazhdojmë me mbledhjen, siç është në plan”, tha Dehari.
Pse po kundërshtohet Haxhiu?
Emri i Albulena Haxhiut u hodh në votim tri herë, por në asnjërin rast ajo nuk arrit t’i marrë 61 votat e nevojshme për t’u bërë kryeparlamentare e Kosovës.
Haxhiu konsiderohet nga Partia Demokratike e Kosovës (PDK) dhe nga Aleanca për Ardhmërinë e Kosovës (AAK) si figurë përçarëse, ndërkaq Lidhja Demokratike e Kosovës (LDK) refuzon të votojë çdo emër të propozuar nga fituesja e zgjedhjeve parlamentare, LVV-ja.
Besar Gërgi nga Grupi për Studime Ligjore dhe Politike (GSLP) i sheh të dyja këto si motive të mundshme.
“Nga njëra anë, ato [partitë politike] duket se kanë një lloj rehatie me situatën, dhe nuk iu bëhet vonë për konstituimin e legjislaturës së nëntë. Por, nga ana tjetër, shihet se kanë edhe një mospëlqim për emrin e caktuar, të zonjës Haxhiu”, thotë Gërgi për Radion Evropa e Lirë.
Më shumë rreth kësaj teme mund të lexoni në tekstin më poshtë:
