Abdixhiku: S’duam debat, mateni veten me vota
Kreu i Lidhjes Demokratike të Kosovës, Lumir Abdixhiku, tha se LDK-ja nuk do të marrë pjesë në debat për formimin e Qeverisë së re, në mënyrë që të lihet menjëherë hapësirë për votim.
“LDK-ja nuk sheh arsye për debat, nuk do të dëgjojë fare asnjë debat. Na keni thënë ‘numrat i kemi’, urdhëroni mateni veten me numra”, tha Abdixhiku.
Ai e quajti “mungesë të dinjitetit” sjelljen e mandatarit Albin Kurti, të cilin e kritikoi për prezantimin e tij, dhe tha se kjo mungesë e dinjitetit e ka bllokuar Kosovës tash e tetë muaj duke e lënë me Qeveri në detyrë.
Krasniqi thotë se programi i Kurtit nuk kishte përmbajtje
Kryetari i Partisë Demokratike të Kosovës (PDK) Memli Krasniqi, ka thënë se Kurti nuk e ka prezantuar ndonjë plan me përmbajtje, por vetëm i ka përsëritur ato që "kinse i ka realizuar" në mandatin e kaluar.
Ai i ka bërë thirrje Kurtit që sa më shpejt ta hedhë në votim atë që e ka prezantuar.
Murati nis debatin pas prezantimit të kabinetit
Ministri në detyrë i Financave, Hekuran Murati e ka nisur debatin pas prezantimit të programit dhe kabinetit qeverisës nga ana e Kurtit, duke përsëritur se asnjëra parti nuk ka qenë e gatshme për koalicion qeverisës, mirëpo që Kosovës i duhet një qeveri e re.
Në mesin e arsyeve e ka përmendur nevojën për miratim të buxhetit të shtetit për vitin e ardhshëm si dhe për zhbllokimin e fondeve që mund t’i pranojë Kosova pas ratifikimit të marrëveshjeve ndërkombëtare.
Ai u ka bërë thirrje të gjithë deputetëve që t’iu japin fund inateve politike.
Kurti prezanton kabinetin qeveritar
Zëvëndëskryeministër i parë dhe ministër i Punëve të Jashtme dhe Diasporës - Glauk Konjufca
Zëvendëskryeministre e dytë dhe ministre e Drejtësisë - Donika Gërvalla
Zëvëndëskryeministër i tretë për Çështje të Pakicave dhe Bashkëpunim Ekonomik - Fikrim Damka
Ministër i Financave dhe Ekonomisë - Hekuran Murati
Ministër për Familje dhe Mirëqenie Sociale - Andin Hoti
Ministër i Mbrojtjes - Ejup Maqedonci
Ministër i Administratës Publike dhe Digjitalizimit - Lulzon Jagxhiu
Ministër i Punëve të Brendshme - Xhelal Sveçla
Ministër i Shëndetësisë - Arben Vitija
Ministër i Arsimit dhe Shkencës - Avni Zogjani
Ministër i Kulturës dhe Turizmit - Fatmir Spahiu
Ministër i Sportit dhe Rinisë - Blerim Gashani
Ministër i Administrimit të Pushtetit Lokal - Rasim Demiri
Ministre e Mjedisit dhe Planifikimit Hapësinor - Fitore Pacolli
Ministër i Bujqësisë, Pylltarisë dhe Zhvillimit Rural - Armend Muja
Ministër i Infrastrukturës dhe Transportit - Dimal Basha
Ministre e Tregtisë, Industrisë dhe Integrimeve Evropiane - Mimoza Kusari
Ministre e Energjisë dhe Minierave - Artane Rivzanolli
Ministër për Komunitete dhe Kthim - Nenad Rashiq
Ministër për Zhvillim Rajonal - Sejnur Veshall