Komunat me shumicë serbe prijnë me dalje në votime
Sipas të dhënave të Komisionit Qendror Zgjedhor, deri në orën 11:00, komunat në veri të Kosovës kanë raportuar daljen më të madhe në zgjedhje.
Komuna e Zveçanit prin me numrin më të madh të votuesve, rreth 34 për qind.
Komuna e Leposaviqit, me mbi 27 për qind, Mitrovica e Veriut me 26 për qind, dhe Ranillug me rreth 12 për qind.
Në Komunën e Prishtinës deri ne orën 11:00 kanë votuar rreth 11 për qind e qytetarëve me të drejtë vote.
Komunat me daljen më të ulët janë Gllogoci dhe Hani i Elezit, me mbi 5 për qind.
Deri në orën 11:00 në Kosovë kanë votuar rreth 8,30 për qind e votuesve.
DnV: Procesi i votimit, i qetë
Koalicioni i organizatave për vëzhgimin e zgjedhjeve në Kosovë, Demokracia në Veprim (DnV) ka thënë se deri në orën 11:00 nuk është raportuar për ndonjë shkelje të madhe të procesit zgjedhor.
“Procesi i votimit deri më tani është duke rrjedhur i qetë, me disa parregullësi të izoluara, të cilat kanë ndodhur në një një numër të vendvotimeve”, ka thënë ai.
Në mesin e shkeljeve ai ka përmendur respektim të pjesshëm të masave për luftim të koronavirusit, raste të votimit me dokumente jovalide, raste kur votuesit nuk kanë gjetur emrat e tyre nëpër vendvotime apo kanë shkelur procedurat për votim me asistencë.
Sikur edhe në zgjedhjet e kaluara, Cakolli ka thënë se edhe këtë herë është raportuar për fotografim të votës.
Serbët në veri votojnë në mënyrë të organizuar
Të drejtuar nga zyrtarë të partisë Lista Serbe, serbët në veri të Kosovës edhe këtë vit kanë shkuar të votojnë në mënyrë të organizuar. Këto janë zgjedhjet e para në veri që nuk organizohen me mbështetjen e Organizatës për Siguri dhe Bashkëpunim në Evropë (OSBE).
Ambasada amerikane bën thirrje për dalje në zgjedhje
Ambasada amerikane në Prishtinë, u ka bërë thirrje të gjithë qytetarëve me të drejtë vote, që të luajnë rolin e tyre për të ardhmen e Kososvës.
“Dilni dhe votoni, mirëpo në mënyrë të sigurt – mbani distancën, vendosni maskën, dhe ndiqni udhëzimet e punëtorëve lokalë për zgjedhje”.