Fitore bindëse e Vetëvendosjes

Përshëndetje lexues të dashur,

Po e nisim tani mbulimin e një dite të gjatë në Kosovë.

Përmes këtij blogu do të mund të informoheni në kohë reale lidhur me procesin zgjedhor.

Do të jemi me ju deri në shpalljen e rezultateve preliminare dhe do të ndajmë me ju materiale nga qendra të ndryshme të Kosovës.

I gjithë ekipi i Radios Evropa e Lirë është i angazhuar për këtë ditë.

Na ndiqni këtu, ose në llogaritë tona në rrjetet sociale, në Facebook, Twitter, Instagram apo YouTube.

Votim në mot të ftohtë

Procesi i votimit po zhvillohet në mot të ftohtë e me borë. Temperaturat minimale do të lëvizin ndërmjet -11 deri -9 gradë Celsius, ndërsa maksimalet e ditës parashihen të lëvizin ndërmjet -5 deri -3 gradë Celsius.

Në orët e hershme të mëngjesit të drejtën e votës e kanë shfrytëzuar, kryetarja e Komisionit Qendror Zgjedhor, Valdete Daka, ushtruesja e detyrës së presidentit, Vjosa Osmani, kryetari i Lëvizjes Vetëvendosje, Albin Kurti, njëherësh kandidat për kryeministër, më pas kandidati i Partisë Demokratike të Kosovës për kryeministër, Enver Hoxhaj, kandidati i Lidhjes Demokratike të Kosovës për kryeministër, Avdullah Hoti dhe disa figura tjera partiake.

Qytetarët e Kosovës po votojnë për zgjedhjet e parakohshme parlamentare, pas më pak se një vit e gjysmë nga zgjedhjet e fundit. Qendrat e votimit janë hapur në ora 07:00 dhe do të mbyllen në ora 19:00. Ajo që i veçon këto zgjedhje është se po zhvillohen në kohë pandemie, si dhe në mot të ftohtë ku temperaturat sillen mes -11 e - 3 gradë Celsius.

Votimi për personat me nevoja të veçanta

Shumë shkolla në Prishtinë dhe vende të tjera, nuk kanë shteg të veçantë për persona me nevoja të veçanta. Në Shkollën e Mjekësisë Ali Sokoli në Prishtinë, personeli i qendrës së votimit, është parë duke ndihmuar këta persona që të ngjiten në katin e dytë të shkollës për të votuar.

Deri në orën 11:00 kanë votuar 8.30 për qind e qytetarëve

Komisioni Qendror Zgjedhor (KQZ) ka njoftuar se deri në orën 11:00 në gjithë territorin e Kosovës kanë votuar 8.30 për qind apo 145,650 qytetarë të Kosovës.

Kryetarja e KQZ-së, Valdete Daka, ka thënë se procesi i votimit është duke u zhvilluar normalisht dhe se nuk ka raportime për incidente që mund të dëmtojnë procesin zgjedhor.

Daka ka thënë se në periudhën e njëjtë kohore, në zgjedhjet parlamentare të vitit 2019, kanë votuar 9.64 për qind e qytetarëve me të drejtë vote apo 174,669 persona.