Trump bëhet presidenti i 47-të i SHBA-së

Për ju që sapo jeni kyçur në blogun tonë, ja disa informacione me rëndësi:

Kur nis ceremonia e inaugurimit?

Donald Trump do të mbërrijë në ndërtësën e Kongresit në orën 16:30, sipas kohës në Kosovë. Pritet që ai të dalë në skenë rreth 45 minuta më vonë.

Kur betohet Trump?

Trump pritet të bëjë betimin në orën 17:47, sipas kohës në Kosovë. Kjo kohë është zgjedhur pasi që Trump do të bëhet presidenti i 47-të.

Kur do të flasë Trump?

Pasi të bëjë betimin, Trump do të mbajë fjalimin tradicional të inaugurimit. Fjalimi është planifikuar të fillojë në orën 17:53, sipas kohës në Kosovë.

Presidenti i zgjedhur, Donald Trump, dhe gruaja e tij, Melania, arritën në Shtëpinë e Bardhë, ku u pritën nga presidenti në largim, Joe Biden, dhe gruaja e tij, Jill.

"Mirë se vini në shtëpi", i tha Biden Trumpit, raporton CNN.

Ata do të ulen për çaj, përpara se të nisen drejt ndërtesës së Kongresit.

Në ditën e inaugurimit të presidentit të zgjedhur amerikan, Donald Trump, shoqata e Kosovës “Miqtë e Amerikës” vendosi një flamur të ri pranë shtatores së ish-presidentit amerikan, Bill Clinton, në Prishtinë.

Kryetari i kësaj shoqate, Agim Rexhepi, tha se ky veprim tregon respekt për popullin aleat dhe mik amerikan.

“Shpresoj që presidenti Trump t’i vazhdojë politikat e të gjithë presidentëve të kaluar të SHBA-së - pavarësisht nëse ata ishin demokratë ose republikanë - në mbështetje të interesave të popullit shqiptar”, tha Rexhepi.

Nga Presidenca e Kosovës u konfirmua se presidentja Vjosa Osmani ka vendosur të dërgojë një delegacion në krye me ambasadorin e Kosovës në SHBA, Ilir Dugolli, në ceremoninë e inaugurimit të presidentit të zgjedhur amerikan, Donald Trump.

Kreu i Aleancës për Ardhmërinë e Kosovës, Ramush Haradinaj, do të marrë gjithashtu pjesë në këtë ngjarje, ashtu si edhe ish-presidenti i Kosovës, Behgjet Pacolli, kryetari i Prishtinës, Përparim Rama, dhe biznesmeni Shkëlqim Devolli.

Për më shumë rreth pjesëmarrësve, lexoni edhe këtë.