د طالبانو او پاکستان استازو د پنجشنبې په ورځ د وري په ۱۳ مه د چین په ارومچي ښار کې خبرې اترې وکړې.
د طالبانو د حکومت د بهرنیو چارو وزارت پرون پنجشنبې تایید کړه چې د دې ډلې د "منځنۍ کچې" یو پلاوی له پاکستاني لوري سره د رسمي خبرو اترو لپاره چین ته رسېدلی دی.
د متقابل درناوي، نه مداخلې او رغنده تفاهم پر بنسټ ډیپلوماټیک تعامل کولی شي د دواړو هېوادونو ترمنځ شته موضوعاتو ته عملي او دوامدار حللارې ومومي
د دې وزارت ویاند عبدالقهار بلخي پرخپله ایکس پاڼه کې لیکلي چې دا بهیر د چین په غوښتنه او د "متقابل درناوي او رغنده تعامل" پر بنسټ مخته وړل کېږي.
هغه زیاته کړې چې د طالبانو حکومت باور لري چې "د متقابل درناوي، نه مداخلې او رغنده تفاهم پر بنسټ ډیپلوماټیک تعامل کولی شي د دواړو هېوادونو ترمنځ شته موضوعاتو ته عملي او دوامدار حللارې ومومي او د سیمې د ثبات او همکارۍ لپاره زمینه برابره کړي."
تر دې مخکې، د پاکستان د بهرنیو چارو وزارت ویاند طاهر اندرابي د پنجشنبې په ورځ په خپلې اوونیزې خبري غونډه کې وویل چې په دې خبرو کې د اسلام آباد ګډون د پاکستان د اصلي اندېښنو بیا ټینګار دی او زیاته یې کړه چې د دې بهیر د عملي پرمختګ مسؤلیت هم د طالبانو پر غاړه دی.
ښاغلي اندرابي زیاته کړه چې هغوی باید د هغو "ترهګرو ډلو" په وړاندې ښکاره او د تایید وړ اقدامات وښيي چې د پاکستان پر ضد د دې هېواد له خاورې کاراخلي."
طالبانو مخکې په کراتو کراتو ویلي چې دوی هیچاته اجازه نه ورکوي چې د افغانستان له خاورې څخه د نورو هېوادونو پر ضد استفاده وکړي.
چین تل د خبرو اترو له لارې په مناسب ډول د افغانستان او پاکستان ترمنځ د شخړو او اختلافونو د حل ملاتړکړی. موږ همداراز د افغانستان او پاکستان ترمنځ د شخړو د حل په برخه کې فعاله منځګړتوب کړی
په همدې حال کې، د چین د بهرنیو چارو وزارت د پنجشنبې په ورځ وویل چې دا هیواد چمتو دی چې د افغانستان او پاکستان ترمنځ د کړکیچ د کمولو او د دواړو لورو ترمنځ د اړیکو د ښه کولو په برخه کې خپل رغنده رول ته دوام ورکړي.
د دې وزارت ویاندې ماو نینګ په پیکینګ کې په یوه خبري غونډه کې که څه هم د پیل شویو خبرو په اړه څه ونه ویل خو په دې برخه کې یې د چین رول مهم وباله: "چین تل د خبرو اترو له لارې په مناسب ډول د افغانستان او پاکستان ترمنځ د شخړو او اختلافونو د حل ملاتړکړی. موږ همداراز د افغانستان او پاکستان ترمنځ د شخړو د حل په برخه کې فعاله منځګړتوب کړی او د تاوتریخوالي په کمولو او د دواړو خواوو د اړیکو په ښه کولو کې به خپل رغنده رول ته دوام ورکړو."
د طالبانو د حکومت د بهرنیو چارو وزارت یوې سرچینې، چې نه یې غوښتل نوم یې څرګند شي، ازادي راډیو ته ویلي چې د دوی په پلاوي کې د بهرنیو چارو، کورنیو چارو، دفاع او استخباراتو وزارتونو استازي شامل دي.
یوې بلې سرچینې ویلي چې د دې مذاکراتو هدف د پاکستان او د طالبانو د حکومت ترمنځ د وروستیو شخړو او تاوتریخوالي پای ته رسول دي.
همداراز، د پاکستان د بهرنیو چارو وزارت یوې سرچینې ازادي راډیو ته ویلي چې د پاکستاني پلاوي مشري سید علي حیدر ګیلاني، چې په دې وزارت کې د افغانستان د څانګې مسؤل دی، پر غاړه لري.
د خبرو اترو په تېرو څو پړاوونو چې په ترکیه، قطر او سعودي عربستان کې ترسره شول، د دواړو لورو لوړپوړو چارواکو ګډون کړی و.