د اوکراین ولسمشر ولودمیر زلنسکي که څه هم پر دغه نوي وړاندیز چې فایننشل ټایمز او رویټرز په تفصیل خپور کړی، تبصره نه ده کړې، خو وړاندې تر دې یې د مسکو له هغې غوښتنې سره مخالفت کړی چې د سولې په بدل کې دې ځینې سیمې ور وسپاري.
زلنسکي ویلي و، دا کار په راتلونکې کې د ورته یرغل په صورت کې د اوکراین دریځ کمزوری کوي.
د وړاندیز په یوه برخه کې د اوکراین د وسله والو ځواکونو د شمېر د کمولو خبره هم شوې ده.
وړاندې دا هم راغلي چې اوکراین کې باید هیڅ بهرنی سرتیری نه وي او ټینګار شوی چې اوکراین باید نور د لرې واټن ویشتونکې وسلې هم ترلاسه نه کړي.
د متحده ایالتونو رسمي سرچینو تراوسه په دې اړه تبصره نه ده کړې.
دا وړاندیز داسې مهال رسنیز کیږي چې د اوکراین ولسمشر د سولې خبرو د پياوړتیا لپاره ترکیې ته سفر کړی دی.
ولودمیر زلنسکي د ټیلګرام چینل په یوه پیغام کې د ترکیې د ولسمشر رجب طیب اردوغان له کوربه توب نه مننه کړې.
زلنسکي ویلي، فقط ولسمشر ډونالد ټرمپ او متحده ایالتونه کافي ځواک لري چې جګړه پای ته ورسوي.
د ترکیې ولسمشر رجب طیب اردوغان یوځل بیا له مسکو او کیف څخه وغوښتل چې د ترکیې په کوربه توب د سولې خبرې له سره پېل کړي.
دا غوښتنه پرون چهارشنبه څو ساعته وروسته له هغه وشوه چې روسیې د اوکراین پر لویدیځو سیمو درانه بریدونه وکړل.
د اوکرایني چاروکو په وینا، دغو بریدونو کې لږ تر لږه ۲۵ تنه وژل شوي او لسګونه نور ژوبل دي.
اردوغان په انقره کې د اوکراین له ولسمشر ولودمیر زلنسکي سره په ګډه خبري غونډه کې وویل " د جګړې دواړو لورو ته د ناوړه اغیزو" له کبله خبرې مهمې دي.