د ترکیې په پلازمېنه انقره کې په لسګونو زره خلکو د یوې قضايي دوسیې پر وړاندې لاریون کړی چې ممکن د اصلي مخالف ګوند د مشر د ګوښه کولو لامل شي.

دا قضیه د ګوند د سلګونو غړو په وړاندې د یو کال اوږدې قضايي ځپنې برخه ګڼل کېږي.

لاریون کوونکي د یکشنبې په ورځ، د ترکیې بیرغونه او د ګوند بینرونه له ځان سره لېږدول او د جمهور رییس رجب طیب اردوغان د استعفا غوښتنې یې کولې.

یوه محکمه به په انقره کې د دوشنبې په ورځ د « خلق جمهوري غوښتونکي ګوند» (CHP) د ۲۰۲۳ کال کانګرس د اعتبار یا ابطال په اړه پرېکړه وکړي ځکه د "قانوني سرغړونو" له تورونو سره مخ دی.

دا پرېکړه ممکن په ګوند کې تحول رامنځته، مالي بازارونه ګډوډ کړي او حتی د ۲۰۲۸ کال د عمومي ټاکنو وخت اغیزمن کړي.

محکمه کولی شي دا پریکړه وځنډوي.

د اسراییل صدراعظم بنیامین نتنیاهو نن بیا خبرداری ورکړچې د حماس پرمشرانو به که هرچیرې وي، له نورو بریدونو ډډه ونکړي. د اسراییل صدراعظم دغه خبرداری د امریکا د بهرنیو چارو له وزیر مارکو روبیو سره له بیت المقدس څخه د کتنې په ترڅ کې د یوه خبري کنفرانس په لړ کې ورکړ.

دغه خبرداری داسې مهال ورکول کیږي چې د عربي او اسلامۍ نړۍ استازي نن دوحه کې جرګه شوي او پر قطر د اسراییل د تیرې اونۍ د ترسره شوي برید په اړه بحث کوي.

تر دغې غونډې مخکې د قطر صدراعظم او د بهرنیو چارو وزیر شیخ محمد بن عبدالرحمن آل ثاني غوښتنه وکړه چې اسراییل ته باید سزا ورکړل شي.

عربي مشران هڅه کوي پر اسراییل فشار راوړي چې منځني ختیځ کې پيل کړې شخړې له هغې ډلې د غزې جګړه ودروي.

د قطر صدر اعظم پر دوحې د اسراییل برید چې په نتیجه کې یې د سخت دریځې حماس ډلې ۵ غړي ووژل شول، پر منځګړو برید بللی.

د پاکستان د پنجاب ایالت سیلاب ځپلو سیمو ته بیرته د بې ځایه شویو خلکو ستنیدنه پېل شوې ده.

دغلته وروستیو موسمي ورښتونو او د سیندونو څپانده کېدو له دوه نیم میلیونو ډېر کسان بې ځایه کړل او شاوخوا سل تنه یې مړه کړل.

په پنجاب کې د ناورین د مدیریت ادارې ویلي، څه باندې ۴۵۰۰ کلي په دغه ایالت کې تر اوبه لاندې شوي وو.

دوی ویلي، دغه کلي وروسته تر هغه تر اوبو لاندې شول چې شړکنده بارانونه وشول او ګاونډي هند د څو بندونو دروازې د ډیر باران له کبله پرانستې.

اکثره سیلاب ځپلي مرستو ته اړ دي او د پنجاب چارواکي وایي، دوی لومړنۍ مرستې ور رسولي.

د سږ کال د جون له میاشتې راهیسې ۹۵۰ تنه پاکستان کې د سیلابونو له کبله مړه شوي دي.

په دوحه کې د عربي او اسلامي هېوادونو د بهرنیو چارو وزیرانو له حضور سره هممهاله د قطر صدراعظم د اسراییلو لپاره د سزا غوښتنه وکړه.

د قطر صدراعظم او د بهرنیو چارو وزیر شیخ محمد بن عبدالرحمن آل ثاني، د عربي او اسلامي هېوادونو د سرمشریزې څخه یوه ورځ مخکې د یکشنبې په ورځ، دا څرګندونې وکړې.

هغه په خپله وینا کې وویل چې قطر د اسراییل او حماس په جګړه کې د اوربند د ترلاسه کولو لپاره د مصر او متحده ایالاتو سره کار کولو ته ژمن دی.

د شېخ محمد په خبره د اسراییلو برید چې د حماس د پنځو غړو او د قطر د یوه امنیتي غړي د وژنې سبب شو د منځګړیتوب په اصل باندې برید ګڼل کېږي.

د اسلامي او عربي هېوادونو مشران او بهرنیو چارو وزیران د اسراییلو د هغه برید په وړاندې د ګډ احتمالي غبرګون په سر د خبرو لپاره ټول شوي چې د حماس افراطي ډلې مشرتابه یې په دوحه کې هدف وګرځوله.

دا په داسې حال کې ده چې د امریکا د بهرنیو چارو وزیر مارکو روبیو یکشنبه اسراییل ته ورسید.

د اسراییلو صدراعظم بنیامین نتنیاهو وویل اسراییلو ته د امریکا د لوړ پوړي ډیپلومات مارکو روبیو سفر د دواړو متحدینو ترمنځ د اړیکو پیاوړتیا ښیي.

امریکايي شرکتونو اعلان کړی چې په برتانیا کې به د ۱،۷ میلیارد ډالرو انډول د ۱،۲۵ میلیارد پونډو په ارزښت پانګونه وکړي. دا اعلان برتانیا ته د امریکا د ولسمشر ډونالډټرمپ د سفر په درشل کې شوی دی.

برتانیا ته د ټرمپ دوه ورځنی سفر راروانه چارشنبې پیلېږي.

بېلابېلو شرکتونو له هغې ډلې سیټي ګروپ، پې پل، د امریکا بانک او بلک راک په برتانیا کې د نویو پانګونو لپاره د تیاریو خبر ورکړی.

همداراز ویل کېږي چې د ټکنالوژۍ په برخه کې اوپن اې آی او اېن ویډیا غواړي د ټرمپ د سفر پرمهال په برتانیا کې څو میلیارد ډالره پانګونه وکړي.

د برتانیا د سوداګرۍ او پانګونو وزیر پیټر کایل ویلي دي چې د ولسمشر ټرمپ د سفر په درشل کې د امریکايي شرکتونو پانګونې د برتانیا له یو نژدې شریک سره د سوداګریزو اړیکو د پیاوړتیا او دوام نښه ده.

د رومانیا دفاع وزارت وايي چې د دې هېواد جنګي جټ الوتکو پرون وروسته له هغه الوتنې پیل کړې چې د روسیې یوه بې پیلوټه الوتکه پر اوکراین د برید پرمهال د دې هېواد قلمرو ته ننوته.

د رومانیا د دفاع وزیر یونوټ موستیانو پرون وویل چې د دې هېواد اف شپاړس الوتکې ډېرې نژدې شوې وې چې د روسیې بې پیلوټه الوتکه چې په ټیټه ارتفاع کې الوتله له منځه یوسي، خو وروسته یې خپل لوری د اوکراین پر لور بدل کړ.

پرون د پولنډ په ختیځ ښار لوبلین کې هم د دې هېواد هوايي قلمرو ته د روسیې د یوې بې پیلوټه الوتکې د ننوتو له کبله خبرداری ورکړل شو. پولنډ درې ورځې مخکې د ناټو په مرسته په خپل هوايي قلمرو کې د روسیې یوه بې پیلوټه الوتکو وویشتلې وه.

د پاکستان پوځ تایید کړې ده چې ډیورنډ کرښې ته څېرمه یې نولس تنه پوځیان د شنبې په ورځ په وسله والو حملو کې وژل شوي دي.

پوځ پرون په یوه بیان کې وویل چې لومړۍ حمله د جنوبي وزیرستان په بدر نومې سیمه کې هغه مهال وشوه چې وسله والو د پاکستان د پوځ د موټرو پر کاروان برید وکړ. په بیان کې راغلي دي چې په دې نښته کې ۱۲ سرتېري او ۱۳ تنه وسله وال ووژل شول او څلور نور کسان ټپیان شول.

د دې برید پړه د پاکستاني طالبانو تحریک ټي ټي پي پر خپلو ټولنیزو پاڼو ومنله.

پوځ په یوه جلا بیان کې په کوز دیر کې هم په یوه نښته کې د اوو سرتېرو او لسو وسله والو د وژل کېدو خبر ورکړی. بیان زیاتوي نښته هغه مهال پیل شوه چې امنیتي ځواکونو د وسله والو یو پټنځای وموند.

پاکستان ادعا کوي چې د پاکستاني طالبانو پټنځایونه په افغانستان کې دي خو افغان طالبانو دا ادعا په وار وار رد کړې ده او وايي پاکستان دې د خپلو ناکامیو پړه د افغانستان غاړې ته نه اچوي.

د کرکټ د آسیايي جام د لوبو په لړۍ کې نن د بنګلدېش او سریلانکا لوبډلې سره مخامخ کېږي. دا لوبه د ماښام په اوو بجو په ابوظبي کې په پام کې ده.

نننۍ لوبه د آسیايي جام د لړۍ چې افغانستان هم پکې لوبېږي، پنځمه لوبه ده.

په پرونۍ لوبه کې پاکستان خپل سیال عمان د ۹۳ منډو په توپیر مات کړ.

پاکستان ۱۶۰ منډې وکړې خو د عمان ټوله لوبډله په ۶۷ منډو اوټ شوه.

د اسراییل پوځ وايي، په تېرو څو اونیو کې له دوه نیم لکو ډېر خلک د غزې له ښاره وتلي او د دې تړانګې په نورو برخو کې ځای پرځای شوي دي.

د اسراییل د پوځ عربي ژبي ویاند ډګروال اویخای ادرعي Avichay Adraee نن پر خپله ایکس پاڼه ولیکل چې د پوځ د اټکل له مخې د غزې د مرکز د یو میلیون اوسېدونکو څلورمه برخه د خپل ځان د خونديتوب لپاره له دې ښاره وتلي دي.

د غزې له دې ګڼ میشتې سیمې د کورنیو وتل وروسته له هغه پیل شول چې د اسراییلو پوځ په دې ښاري سیمه کې پوځي عملیات پیل کړل.

د غزې د ملکي دفاع ادارې ویلي دي چې اسراییلي پوځ پرون جمعه په دې سیمه کې پنځوس کسان د پوځي عملیاتو په ترڅ کې ووژل.

د خیبرپښتونخوا ایالتي چارواکي وايي چې لږترلږه ۱۲ تنه پاکستاني سرتېري د پاکستاني طالبانو په کمین کې ووژل شوي دي.

چارواکو فرانسپرس خبري آژانس ته ویلي دي چې وسله والو نن سهار وختي مهال په جنوبي وزیرستان کې د پوځ د موټرو پر کاروان برید وکړ. د دوی په وینا له برید وروسته په نښته کې ۱۲ امنیتي سرتېري ووژل شول او ۴ نور ټپیان شول.

یوه سیمه ایز چارواکي فرانسپرس ته د دې سرتېرو وژل تایید کړل او ویې ویل چې بریدګرو د امنیتي ځواکونو وسلې هم ولجه کړې.

د دې برید پړه د پاکستاني طالبانو تحریک TTP پر خپلو ټولنیزو پاڼو منلې ده.

دا په خیبرپښتونخوا کې چې پاکستاني طالبان او نورې وسله والې ډلې پکې فعالې دي، د وروستیو څو میاشتو تر ټولو خونړۍ حمله وه.