دې وزارت د جمعې په ورځ ناوخته پر خپل ایکس/ پخواني ټویټر پاڼه ویلي، دا اقدام د پاکستان د ورته پرېکړې پر بنسټ ترسره کېږي.
تر دې مخکې د پاکستان د بهرنیو چارو وزیر اسحاق ډار ویلي وو، چې په افغانستان کې د طالبانو له حکومت سره ډیپلوماټیکې اړیکې د شارژدافیر له کچې د سفیر کچې ته پورته کوي.
ډار د جمعې په ورځ پر خپله ایکس/ پخواني ټویټر پاڼه ویلي وو، چې دا اقدام یې کابل ته د وروستیو سفرونو او هلته له چارواکو سره د لیدنو کتنو وروسته کوي.
په ورته وخت کې یو شمېر پاکستاني رسنیو په نژدې راتلونکې کې اسلاماباد ته د طالبانو د حکومت د بهرنیو چارو د وزیر امیرخان متقي د سفر خبر هم ورکړی، خو د نوموړي د سفر د نېټې په اړه تر اوسه څه نه دي ویل شوي.
پاکستان دوه لسیزې وړاندې په افغانستان کې د طالبانو حکومت په رسمیت پیژندلی و او ورسره یې نژدې اړیکې درلودې.
په افغانستان کې د طالبانو له بیاځلي واکمنۍ راوروسته، که څه هم پاکستان لکه نوره نړۍ د طالبانو حکومت په رسمیت نه دی پیژندلی، خو تر ټولو نژدې ډیپلوماټیکې اړیکې یې ورسره لرلي. له هماغه پیله یې په پاکستان کې د افغانستان په ټولو سیاسي او کونسلي استازولیو کې د طالبانو د حکومت استازي منلي، او کابل کې یې هم خپل سفارت پرانیستی ساتلی.
خو په وروستیو څو کلونو کې اسلاماباد پر کابل پرلهپسې د پاکستاني طالبانو د تحریک د ملاتړ تورونه پورې کوي، هغه څه چې د کابل طالب واکمن یې ردوي. دې تورونو ، له پاکستان څخه په جبري توګه د لسګونو زرو افغان کډوالو ایستلو او د دواړو خواوو ترمنځ پر ډیورنډ لاین وخت ناوخت نښتو ظاهرا د دواړو لورو اړیکې ترینګلې کړي دي.
خو د پاکستان د بهرنیو چارو وزیر اسحاق ډار هېله څرګنده کړې چې د سفیرانو کچې ته د ډیپلوماټیکو اړیکو پورته کیدل به د دواړو هېوادونو ترمنځ امنیتي، اقتصادي او سوداګریزې همکارۍ پیاوړې کړي.
