د فرانس پریس خبري اژانس د راپور له مخې، چارواکو ویلي دي چې په بهر کې د یو شمیر ډیپلوماټیکو ماموریتونو تړل، د دیپلوماتانو د شمیر کمول، او د ملګرو ملتو او ناټو په شمول د نړیوالو سازمانونو د بودیجې د کمیدو وړاندیز شوی دی.
دا وړاندیز تیره اونۍ د بهرنیو چارو وزارت ته وړاندې شو او لا هم په لومړنیو مرحلو کې دی.
د فرانس پریس خبري اژانس د راپور له مخې، د متحده ایالاتو د بهرنیو چارو وزارت د غونډو د یادښتونو پر بنسټ په دې وړاندیز کې د هغه اصلي دفتر حذفیدل هم شامل دي د طالبانو له واکمنۍ څخه تښتیدلي افغانان په نورو هیوادونو کې میشتوي، همداراز د خپلواک حکومت د څارنې دفتر چې په افغانستان کې د امریکا د پروګرامونو د موثریت او د فساد د اروزنې چارې مخته وړي، بندیدل په دې وړاندیز کې شامل دي.
د یادښتونو پر بنسټ په دې وړاندیز کې د هغو بودیجو پر نیمایي کیدو تاکید شوې دی چې د امریکا د بهرنیو چارو د وزارت او د امریکا د پرمختیایي ادارې( یو ایس ایډ) له لورې مخته وړل کیږي.
دا بودیجه په ۲۰۲۴ کال کې نږدې ۵۲ ملیارده ډالر وه.
د فرانس پریس اژانس په وینا، هغه چارواکي چې له دې موضوع سره بلد دي وايي چې دا وړاندیز باید لاهم د بیاکتنې له څو مرحلو څخه تیر شي مخکې لدې چې کانګرس ته وړاندې شي. د کانګرس غړیو په تیرو وختونو کې د سپینې ماڼۍ د اصلاحاتو لپاره د بودیجې غوښتنې سمې کړي او حتی رد کړې دي.