د اوکراین پر سومي ښار د روسیې پروني خونړي برید د امریکا او اوروپایي مشرانو غبرګونونه پارولي دي.
د یکشنبې ورځې دغه توغندیز برید کې د دوو ماشومانو په ګډون ۳۴ تنه ووژل شول او د پنځلسو ماشومانو په ګډون ۱۱۷ نور ټپیان شول.
د اروپایي کمیسیون مشرې اورسلا فون دیرلاین دا برید " د نړیوالو قوانینو ښکاره نقض " بللی او زیاته کړې ده چې اوربند ته پیاوړي اقدامات په کار دي.
په سیمه کې د ازادې اروپا/ ازادۍ راډیو خبریال ویلي، برید د سومي ښار په مرکز کې هغه مهال شوی چې ګڼه ګوڼه زیاته وه او مسیحیان د یکشنبې ورځې عبادت لپاره کلیسا ته روان وو.
د امریکا د بهرنیو چارو وزیر مارکو روبیو د قربانیانو له کورنیو سره خواخوږي ښودلې او ویلې یې دي، د همدې ډول غمیزو د مخنیوي لپاره د ډونالډ ټرمپ اداره هڅه کوي چې د اوکراین جګړه پای ته ورسوي.
د بریتانیا، فرانسې، جرمني او ایټالیا مشرانو هم برید غندلی دی.