د افغان کډوالو د ایستلو په باب د مرکزي حکومت د پالیسۍ خلاف د پاکستان د خیبرپښتونوا اعلی وزیر علي امین ګنډاپور وايي اجازه نه ورکوي چې افغان کډوال په زور وایستل شي.
ګنډاپور د جمعې په ورځ په یوه کنفرانس کې د ګڼو نورو مساییلو تر څنګ د افغان کډوالو په باب هم وغږېده:
«افغان کډوال به هېڅ یو په زور نه ایستل کېږي. دا واضح پیغام دی. د صوبې پولیس او د صوبې پوځیان به هېڅوک په زور نه باسي.»د خیبرپښتونخوا اعلی وزیر علي امین ګنډاپور
هغه زیاته کړه:
«دغسې شرایطو کې چې هلته [افغانستان کې] هغوی ته بند و بست نه وي، حکومت یې خپل نه کړای شي، هلته د هغوی د اوسېدو او د ژوند لپاره څه ترتیب نه وي نو دې طریقه باندې د خلکو ایستل نه زموږ پالیسي ده نه زموږ روایات دي او نه داسې کار ته اجازه ورکوو.»
د پاکستان د خیبرپښتونخوا اعلی وزیر ښاغلي ګنډاپور داسې وخت د افغان کډوالو له جبري ایستلو سره کلک مخالفت ښوولی چې د پاکستان حکومت د مارچ له ۳۱مې وروسته د افغان تابعیت لرونکو کډوالو ایستل پيل کړي.
د راپورونو له مخې لږ تر لږه اته لکه افغان کډوال د تابعیت کارتونه لري. دغو کډوالو ته ویل شوي وو چې د مارچ تر ۳۱مې له راولپنډۍ او اسلام اباد ووځي که نه په زور به وایستل شي.
په تېرو څو ورځو کې سلګونه دا افغانان نیول شوي او له ډلې یې ګڼ افغانستان ته ډيپورټ شوي دي.
د پاکستان حکومت د دغو کډوالو لپاره په راولپنډۍ او دېخوا د خیبر په لنډي کوتل کې کمپونه جوړ کړي څو یې د ډيپورټ څخه مخکې هلته وساتي.
معلومه نه ده چې څومره د پاکستان پوځیان او پولیس د خیبرپښتونخوا د اعلی وزیر اوامر پر ځای کوي.
ځکه د راپورونو له مخې تېره ورځ د خیبرپښتونخوا په سرښار پېښور کې پولیس کور په کور په افغان کډوالو پسې ګرځېدل او ځینو ته خبرداری ورکړل شوی چې ژر ووځي.
د خیبرپښتونخوا اعلی وزیر د کډوالو د موضوع سربېره پخوا هم په افغانستان کې له طالبانو سره د مذاکرو او ځینو نورو مساییلو په اړه څرګندونې کړې وې چې بیا د پاکستان مرکزي حکومت رد کړې وې.
ګنډاپور د پاکستان د تحریک انصاف ګوند مخکښ غړی دی چې په صوبايي ټاکنو کې یې د خیبرپښتونخوا ایالت ګټلی دی.
مرکزي حکومت د مسلم لیګ ن او پیپلز پارټۍ په لاس کې دی چې تر ډېره د تحریک انصاف له ګوند سره جوړ نه دي.
