ښاغلي فایق دا څرګندونې د پنجشنبې په ورځ د ملګرو ملتونو د سازمان له خوا جوړې شوې «له افغانستان څخه نیویارک ته: افغان ښځې د عمل غوښتنه کوي» غونډې ته وکړې.
نوموړي زیاته کړې:
"زه له ټولو غواړم چې دا موضوع جدي ونیسي او دا وار یوازې د اندېښنو له څرګندولو ورهاخوا، د عملي او همغږي اقداماتو لور ته لاړ شو. موږ باید ډاډ ترلاسه کړو چې د افغان ښځو غږ یوازې نه اورېدل کېږي، بلکې هغه پالیسۍ او اقداماتو ته بدلېږي چې د دوی ملاتړ وکړي. د دې پوښتنو ځواب باید افغان مېرمنې راکړي."
دا غونډه، چې د بېلابېلو هېوادونو استازو او یو شمېر افغان ښځینه فعالانو په کې ګډون کړی و، د ښځو د وضعیت کمیسیون (CSW69) د ناستې په څنډه کې ترسره شوه. ګډونوالو د افغان ښځو د ملاتړ لپاره پر جدي اقداماتو ټینګار وکړ.
په ملګرو ملتونو کې د البانیا استازې، سویلا جنینا هم وویل چې د افغان ښځو غږ باید واورېدل شي.
نوموړې زیاته کړه:
"طالبانو سره په خبرو کې تر هغه پرمختګ ناشونی دی، تر څو چې پخپله افغان ښځې پکې حضور ونه لري او د دوی د حقونو ملاتړ و نه شي. زه باور لرم چې افغان ښځې یوازې زموږ همدردۍ ته اړتیا نه لري، بلکې د عملي، جدي او مؤثر اقدام غوښتنه لري، چې باید د سیاست له کچې پیل شي."
د غونډې ګډونوالو، چې د هالند، فرانسې، استرالیا، ایټالیا، چیلي، یونان او کاناډا استازي پکې شامل وو، د افغان ښځو پر ملاتړ ټینګار وکړ او د عملي اقداماتو غوښتنه یې وکړه.
"نړیواله ټولنه باید طالبان د افغان ښځو د حقونو رعایت ته اړ کړي"
په دې غونډه کې د افغانستان یوې ښځینه فعالې، چې نه غواړي نوم یې خپور شي، ازادي راډیو ته وویل:
"نړیواله ټولنه باید له هرې ممکنې لارې پر طالبانو فشار راولي، څو هغوی مجبور شي چې افغان ښځو ته د زدهکړې او کار حق ورکړي. همداراز، اغېزناک هېوادونه باید له طالبانو سره خپلې اړیکې د ښوونځیو او پوهنتونونو د پرانېستو شرط پورې وتړي. یوازې خبرې او غونډې بسنه نه کوي، عملي اقدامات اړین دي."
د طالبانو حکومت د ۲۰۲۱ کال په اګست کې د بیا واکمنېدو راهیسې، د ښځو او نجونو پر زدهکړو، کار، سیاسي او ټولنیزو فعالیتونو او ازاد تګراتګ ګڼ محدودیتونه او بندیزونه لګولي دي.
که څه هم دا محدودیتونه د افغانانو او نړیوالې ټولنې له پراخ غبرګون سره مخ شوي، خو د طالبانو حکومت تر اوسه خپلې پرېکړې نه دي بدلې.
د طالبانو حکومت ویاند ذبیح الله مجاهد د مارچ په اتمه، د ښځو د پیوستون نړیوالې ورځې په مناسبت په خپله ایکس/ پخواني ټویټر پاڼه لیکلي وو:
"په یوه اسلامي او افغاني ټولنه کې د افغان ښځو حقونه د لوېدیځې ټولنې له کلتور سره څرګند توپیر لري، چې باید د محاسبې پر مهال په پام کې ونیول شي."
له دې وړاندې هم طالب چارواکو ادعا کړې چې د افغان ښځو، او ټول افغانانو حقونه د اسلامي شریعت په چوکاټ کې خوندي دي.
خو دې ډلې په څرګنده نجونې له شپږم ټولګې پورته له زده کړو منعه کړي دي او په دولتي او نادولتي ادارو کې یې د افغان ښځو پر کار بندیز لګولی دی. طالبانو حکومت همدارنګه د بیلابیلو فرمانونو په ترڅ کې د افغان ښځو د ورځني ژوند پر نورو برخو هم پراخ محدودیتونه عملي کړي دي.