د دې تاریخ له مخې، د ښځو لومړۍ نړیواله ورځ د ۱۹۰۹ کال د فبرورۍ په ۲۸مه په متحده ایالاتو کې ولمانځل شوه. د هغه وخت سوسیالیست ګوند دا ورځ د ۱۹۰۸ کال د نیویارک د اعتصاب کوونکو ښځینه کارګرانو د درناوي لپاره وقف کړه.
د ښځو نړیوالې ورځې رسمي تاسیس
په ۱۹۱۰ کال کې، سوسیالیست نړیوال ګوند د ډنمارک په کوپنهاګن کې په یوه غونډه کې د ښځو نړیواله ورځ تاسیس کړه. د دې ورځې ټاکلو موخه دا وه چې په ټوله نړۍ کې د ښځو یووالی او پیوستون پیاوړی کړي، ترڅو د دوی تر پښو لاندې شوي حقونه ترلاسه شي.
که څه هم، د دې غونډې ګډونوالو د ښځو نړیواله ورځ تائید کړه، خو کومه ځانګړې نیټه یې ورته اعلان نه کړه.
لومړني لمانځنې او نړیوال پرمختګونه
د کوپنهاګن کنفرانس په پایله کې، د اتریش، ډنمارک، جرمني او سویس هیوادونو په ۱۹۱۱ کال کې د مارچ ۱۹مه د ښځو د نړیوالې ورځې په توګه ولمانځله، چې پکې په ملیونونو ښځو او نارینه وو په لاریونونو کې برخه واخیسته.
د رایې ورکولو حق او په سیاسي دفتر کې د نوماندۍ حق سربېره، ګډونوالو د ښځو د کار کولو حق، تخنیکي او مسلکي روزنې ته لاسرسی، او په کارځای کې د جنسیتي تبعیض د پای ته رسولو غوښتنه وکړه.
د جګړې ضد مبارزه او د ښځو نړیواله ورځ
د لومړۍ نړیوالې جګړې پر مهال، د ښځو نړیواله ورځ هم د جګړې پر ضد د اعتراضونو لپاره یو مهم پلیټ فارم وګرځېد. روسیې ښځو د فبرورۍ په لومړۍ یکشنبه د ښځو ورځ ولمانځله، خو په اروپايي هیوادونو کې دا ورځ د مارچ په اتمه یا له هغې مخکې او وروسته لمانځل کېده.
ملګري ملتونه او د ښځو نړیوالې ورځې رسمي پېژندنه
ملګرو ملتونو په ۱۹۷۵ کال کې د مارچ په اتمه د ښځو نړیواله ورځ لمانځل پیل کړل.
خو د ملګرو ملتونو عمومي اسامبلې په دسمبر ۱۹۷۷ کال کې اعلان وکړ چې غړي هېوادونه کولی شي د ښځو نړیواله ورځ او د سولې نړیواله ورځ د خپلو کلتوري او ټولنیزو شرایطو سره سم په مختلفو ورځو کې ولمانځي.
د ښځو نړیواله ورځ د هغو لاسته راوړنو یادونه کوي چې په تېرو لسیزو کې ښځو د مساوي سیاسي، ټولنیز، او اقتصادي مقام ترلاسه کولو لپاره کړې دي.
دا ورځ په ډېرو هیوادونو کې د رخصتۍ په توګه پیژندل کېږي او د مساوات غوښتونکو ښځو د هڅو د لمانځلو لپاره یوه مهمه موقع بلل کېږي.
نن ورځ، د ښځو نړیواله ورځ نه یوازې د هغوی د حقوقو یادونه کوي، بلکې لا هم د جنسیتي نابرابرۍ، تبعیض، او تاوتریخوالي پر ضد د مبارزې لپاره کارول کېږي.