په جرمني کې میشت یو شمیر افغان کډوال هیله مند دي چې جرمني به د افغانانو ملاتړ ته دوام ورکړي، خو په ورته وخت کې د دوی په وړاندې د تبعیضي چلند د احتمال په اړه هم اندیښمن دي.
په جرمني کې مېشت افغان کډوال زاهد مصطفی د سه شنبې په ورځ (د کب په ۷مه) ازادي راډیو ته وویل " زما تصور دا دی چې د کډوالو په منلو کې بدلونونه رامنځته کېږي او د کډوالو د ایستلو په برخه کې هم چې اوس کډوال د جرمني په ټولنه کې په یو ډول نه منل کېږي یا نه ادغامېږي."
دغه هېواد کې بل مېشت افغان کډوال خوشحال اصفي هم وویل " له وړاندې اندېښنې موجودې وې، هر هغه حکومت چې په راتلونکو اونیو کې په جرمني کې جوړېږي، نور به د یو شمېرکډوالو د عسل میاشت ورو خو بالاخره پای ته ورسېږي، محدودیتونه او ستونزې به نورې هم زیاتې شي."
هر هغه حکومت چې په راتلونکو اونیو کې په جرمني کې جوړېږي، نور به د یو شمېرکډوالو د عسل میاشت ورو خو بالاخره پای ته ورسېږيجرمني کې میشت افغان کډوال
بلخوا ځینې افغانان چې په ګاونډیو هیوادونو په ځانګړي ډول پاکستان کې جرمني ته د لیږدولو په تمه دي، هم ویره لري چې د کډوالۍ ضدپالیسۍ به دې هیواد ته له ګواښ سره مخ افغانانو د لیږد پر بهیر هم اغېز ولري.
له دې ډلې شګوفې ازادي راډیو ته وویل " هغه کډوال چې په دریمو هېوادونو کې جرمني ته لېږد په تمه دي، ډېرې اندېښنې لري، چې په دې کې د کډوالو اړوند د دغه هېواد د نوي دولت د پرېکړې پایله هم شامله ده،زما هیله او غوښتنه له جرمني دا ده، هغه کسان چې په ډیرو زیاتو ستونزو او ننګونو تر دریمو هېوادونو راغلي اوانتقال ته په تمه دي، د دوی غوښتنلیکونه دې په کره ډول وڅېړي او دوی ته دې مثبت ځواب ووایي."
دا په داسې حال کې ده چې د ولت ام زونتاګ په ګډون جرمني رسنیو د راپورونو له مخې، د جرمني حکومت له پارلماني انتخاباتو مخکې له پاکستانه جرمني ته د سلګونو افغان کډوالو د لېږدولو دوه چارټر الوتنې وځنډولې، خو دې ورځپاڼې لیکلي چې د دغه هیواد د بهرنیو چارو وزارت یې لامل تخنیکي ستونزې بللې دي.
د جرمني پارلماني ټاکنې د فبروري په ۲۳مه ترسره شوې او کډوالي د ټاکنیزو کمپاینونو یوه له مهمو مسلو وه.
په دې ټاکنو کې، د فردرېش مرتس په مشرۍ د مسیحي محافظه کاره ایتلاف د جرمني د پارلمان له ۶۳۰ څوکیو څخه ۲۱۰ څوکۍ وګټلې چې وروسته به له نورو ګوندونو سره په ایتلاف د دغه هېواد راتلونکی حکومت جوړ کړي.
د فردرېش مرتس ګوند په یادو ټاکنیزو کمپاینانونو کې د مالیاتو پر کمولو، د پوځ په پیاوړتیا او د کډوالۍ قوانینو پر اصلاح کولو ډیر ټینګار کاوه.
د یادونې ده په دې وروستیو کې چې په جرمني کې چې د افغانانو په ګډون د ځینو کډوالو لخوا کومې پیښې رامنځته شوي، د کډوالو اړوند بحثونه یې تر بل هر وخت ډیر تاوده کړي دي.