د اغا خان بنسټ له لوري خپور شوي بیان کې راغلي، چې کریم اغا خان د سهشنبې په ورځ، د فبرورۍ ۴مه، د پرتګال په لیسبون ښار کې له نړۍ سترګې پټې کړې.
په بیان کې ویل شوي چې د اغا خان ځایناستی به په نږدې ورځو کې اعلان شي.
اغا خان؛ د میلیونونو اسماعیلیه مسلمانانو مذهبي مشر
اغا خان د افغانستان په ګډون، د نړۍ په لسګونو هېوادونو کې د میلیونونو اسماعیلیه مسلمانانو مذهبي مشر و او د څو لسیزو لپاره یې د دې ټولنې مشري وکړه.
که څه هم په افغانستان کې د اسماعیلیه مذهب د لارویانو کره شمېر معلوم نه دی، خو د بدخشان ولایت، په ځانګړې توګه د شغنان، اشکاشم، او پامیر ولسوالۍ د اسماعیلیه ټولنې مهم مرکزونه ګڼل کېږي.
د افغان عالمانو غبرګون
یو شمېر افغان عالمانو کریم اغا خان د بشري خدمتونو لپاره په نیک نوم یاد کړی دی.
شیعه مذهبي عالم، عنایتالله حفیظ، ازادي راډیو ته وویل:
"هغه د خپل وخت غوره مشر و. نه یوازې یې خپلو لارویانو ته خدمت وکړ، بلکې په ټوله نړۍ، په ځانګړي ډول افغانستان کې، یې د خلکو د هوساینې لپاره پراخې پراختیایي هڅې وکړې."
اغا خان؛ مذهبي مشر او د خیر ښېګڼې شخصیت
اغا خان د مذهبي مشرۍ تر څنګ، په خیریه او پراختیایي چارو کې هم یو مهم شخصیت و.
نوموړي د اغا خان بنسټ جوړ کړ، چې د افغانستان، تاجکستان، او بنګلهدېش په ګډون، د روغتیا، تعلیم، کلتور، او اقتصادي پراختیا په برخو کې فعالیت کوي.
دې بنسټ په میلیونونو ډالر د روغتونونو، ښوونځیو، کورونو، او نورو اساسي تاسیساتو جوړولو ته ځانګړي کړي دي.
د افغانانو غبرګون: "د اغا خان مړینه لویه ضایعه ده"
محمد رضا، چې د اسماعیلیه ټولنې یو غړی دی، ازادي راډیو ته وویل:
"هغه د مذهب، کلتور، تعلیم، او درملنې په برخو کې، د مذهبي، ژبني، یا نژادي تبعیض پرته، ارزښتناک خدمتونه وکړل. د کریم اغا خان مړینه یوه لویه ضایعه ده."
د اغا خان بنسټ له ۲۰۰۲م کال راهیسې په افغانستان کې فعالیت کوي.
د دې بنسټ خدمات په روغتیا، تعلیم، کلتور، او اساسي زیربناوو تمرکز لري.
د اغا خان ژوند
- زیږېدنه: ۱۹۳۶، سویس
- تعلیم: د اسلام تاریخ یې په هاروارد پوهنتون کې لوستی
- مشري: په ۱۹۵۷م کال، د ۲۰ کلنۍ په عمر د خپل نیکه ځایناستی شو او د اسماعیلیه مسلمانانو ۴۹م امام وټاکل شو.
