له ښاغلي بلینیکن څخه بیا پوښته وشوه چې یوې خواته مو له طالبانو سره روغه کوله، بل پلو مو افغان ځواکونو ته ویل چې مقاومت وکړئ، دا تضاد نه و؟ بلینیکن وویل چې هو همداسې و.
د امریکا د بهرنیو چارو وزیر انټوني بلینکین د استازیو جرګې د بهرنیو اړیکو کمیټې ته وویل، د روسیې په ګډون به د متحد ایالتونو مخالفین خوشاله شوي وای که چیرته امریکایي ځواکونه د شلو نورو کلونو لپاره په افغانستان کې پاتې شوي وای.
د استازیو جرګې د بهرنیو اړیکو د کمیټې مشر مایکل مک کال د دې غونډې پرمهال د کابل په هوایي ډګر کې د دوه زره یو ویشتم کال د اګست په میاشت کې د چاودنې پرمهال د دیارلس امریکایي سرتیرو د وژلو او د هغو زرګونو افغانانو د غیر منظم ایستلو لپاره چې له امریکایي ځواکونو سره یې کار کاوه د ولسشمر بایډن اداره تورنه کړه، ده ښاغلی بلینکین مخاطب کړ او ویې ویل: " تاسو د سقوط په برخه کې د خپل پروسونل خبرداری له پامه غورځولی و ".
د دې په ځواب کې بلینکین وویل، هر امریکایی چې غوښتل یې له افغانستانه ووځي هغه ته فرصت برابر شو او په زرګونو افغانان د نړۍ په بیلابیلو سیمو کې ځای پرځای شول همداراز واشنګتن اوس هم د پاتې افغانانو د ځای پرځای کولو لپاره ژمن دی.
ښاغلي بلینکین بیا د دوحې د تړون په اړه غونډې ته وضاحت ورکړ او ویې ویل،
"د افغانانو ترمنځ خبرې، د دې خبرو په ترڅ کې اوربند او د افغانستان د راتلونکې لپاره د لارې نقشه او د تړون پر مهال موږ دا ژمنه وکړه چې له افغانستانه د مې په یو دیرشمه نیټه ووځو او د طالبانو پنځه زره زندانیان به خوشي کیږي ".
د استازیو جرګې یوه غړي تر دې خبرو وروسته وویل، "د دې پنځه زره کسانو په منځ کې ترهګر وو، جګړه مار وو او هغه کسان وو چې بیرته د جګړې ډګر ته ستنیدل چې د افغان حکومت پرضد جګړه وکړي د هغه حکومت پرضد چې موږ یې ملاتړ کاوه ".
بلینکین یې په ځواب کې وویل چې هو همداسې و، خو کله چې بیا له بلینکین څخه پوښتنه وشوه چې د سولې په خبرو کې د افغان حکومت استازي وو؟
بلینکین ځواب ورکړ چې نه وو. د استازیو جرګې یوه غړي په لږ لوړ غږ وویل چې ولې د هغه حکومت استازي په دې خبرو کې نه وو چې موږ یې ملاتړ کاوه؟
د امریکا د بهرنیو چارو وزیر د دې سوال په ځواب کې وویل:
"دې سوال ته ځواب نه شم ورکولی، هغه وخت زه هلته نه وم ".
له ښاغلي بلینکین څخه بیرته دا پوښتنه وشوه چې د افغان حکومت راتلونکې مو له خطر سره نه وه مخامخ کړې؟
ده دا خبره تایید کړه او د امریکا د مرکزي قومانداني« سنټکام» د پخواني قوماندان جنرال فرانک مککنزي تیرو خبرو ته یې اشاره وکړه او ویې ویل:
"همداسې ده، جنرال مککنزي دې ټکي ته په خپله استعماعیه غونډه کې اشاره کړې وه چې د دوحې تړون د اعتماد جوړونې په برخه کې یو ناورین رامنځته کړ، همداراز د افغان حکومت د راتلونکې په اړه او تر یوه بریده د افغان امنیتي ځواکونو د خوندیتوب لپاره ".
د دوحې تړون د دوه زره شلم کال د فبروري په نهه ویشتمه د امریکا په استازیتوب زلمي خلیلزاد او د طالبانو په استازیتوب ملا عبدالغني بردار لاسلیک کړ. ښاغلي خلیلزاد اوس ویلي دي چې د ټرمپ له انتخابیدو سره د دوحې تړون د ټولو عناصرو عملي کیدو ته فرصت برابر شوی دی.
ټاکل شوې ده چې ډانالډ ټرمپ د جنوري په شلمه د امریکا د ولسمشر په توګه لوړه وکړي، ده د انتخاباتي کمپاین پرمهال ویلي و چې له هغو جګپوړیو مسوولینو به وغواړي چې استعفی وکړي چې له افغانستانه یې د امریکایي ځواکونو د وتلو مسوولیت درلود.
ډیموکراتان ټینګار کوي چې له افغانستانه د امریکایي ځواکونو د وتلو مسوولیت تر ډيره د ټرمپ د ولسمشرۍ د لومړۍ دورې په غاړه دی چې له طالبانو سره یې د سولې تړون وکړ.
