نړۍ
امریکايي او روسي استازو لفظي شخړه کړې او یوبل یې د تروریزم په ملاتړ تورن کړي
په ملګرو ملتونو کې د روسیې او متحدوایالتونو استازو تېره شپه په سوریه کې د روان بحران په اړه د امنیت شورا په غونډه کې لفظي شخړه وکړه او یوبل یې د تروریزم په ملاتړ تورن کړل.
په ملګرو ملتونو کې د امریکا مرستیال سفیر رابرټ ووډ په خپلو خبرو کې په سوریه کې د روان کړکېچ د کمېدو او د ملکي وګړو د خونديتوب غوښتنه وکړه.
هغه د ولسمشر بشار الاسد ځواکونه او روسیه پر ښوونځیو او روغتونو د حملو پر مهال د ملکي وګړو په مرګژوبله تورن کړل او په ځواب کې یې په ملګرو ملتونو کې د روسیې سفیر واسیلي نیبینزیا وویل، دا تصور هم لا نه شي کېدای چې واشنګټن به په اخلاص سره د تروریزم پر ضد مبارزه وکړي.
د سوریې د حکومت مخالفې هیات تحریر شام ډلې تېره اوونۍ حلب ښار ونیو، او د سوریې ځواکونو د روسیې په مرسته له حلب ښار څخه د دې ډلې د وسلهوالو د ایستلو لپاره هوايي حملې پیل کړې دي.
د ورځې تازه خبرونه دلته ولولئ
د جنوبي کوريا د پارلمان غړو د دغه هېواد د ولسمشر د استيضاح طرحه وړاندې کړې
د جنوبي کوریا د پارلمان غړو نن سهار د دې هېواد د ولسمشر د استیضاح طرحه پارلمان ته وړاندې کړې ده.
د پارلمان دې غړو د جنوبي کوریا ولسمشر یون سوک یول تورن کړی چې، له جنايي څېړنو د ځان او خپلې کورنۍ د خلاصون په موخه يې پوځي حکومت اعلان کړ.
یون تېره شپه په جنوبي کوریا کې د هغه په خبره، ځکه پوځي حکومت اعلان کړ چې په خپلو سیاسي مخالفیو کې د "دولت ضد څېرې" لهمنځه یوسي.
خو له اعلان سره سم، د پارلمان او د جنوبي کوریا د پوځ ترمنځ شخړه پیل، په پایله کې يې دا پرېکړه لغوه شوه.
یون سوک یول چې یو محافظه کار سیاستوال دی او ۲۰۲۲ کال را په دېخوا د جنوبي کوریا واک په لاس کې لري، اوسمهال له یو نامعلومه برخلیک سره مخامخ دی.
د پارلمان یو غړي کیم سونګ وون ویلي: "دا یو نه بښونکی جنایت دی."
د راپورونو پر بنسټ، د جنوبي کوریا د قانون پر بنسټ دغه طرحه له ۲۴ څخه تر ۷۲ ساعتونو وروسته په پارلمان کې رای ورکولو ته ايښودل کېږي.
د پاکستان پوځ خيبر پښتونخوا کې د پنځه وسلهالو د وژنې خبر ورکړی
د پاکستان پوځ وايي، امنیتي ځواکونو يې پرون چهارشنبې د دې هېواد په شماللوېدیځ کې د وسلهوالو پر یوه پټنځای برید کړی چې له کبله يې نښته رامنځته شوې ده.
د پوځ په خبره، په نښته کې پنځه وسلهوال وژل شوي او دوه نور ټپیان دي.
د اسوشېټېډ پرېس خبري اژانس د راپور پر بنسټ، برید د خیبر پښتونخوا په لکي مروت سیمه کې شوی دی.
د پاکستان پوځ د وژل شویو او ټپي وسلهوالو د هویت په اړه څه نهدي ویلي.
کهڅه هم تر اوسه په پاکستان کې مېشتو وسلهوالو ډلو د پوځ دې ادعا ته غبرګون نهدی ښودلی، خو په تېر کې د ورته بریدونو او وسلهوالو نښتو مسوولیت په سیمه کې فعالې د تحریک طالبان پاکستان یا ټيټيپي او ورته نورې وسلهوالې ډلې پر غاړه اخلي.
د سولې نوبل جايزې ګټونکې نرګس محمدي د درې اوونيو لپاره له زندانه خوشې شوې ده
د دوه زره درویشتم کال د نوبل د سولې د جایزې ګټونکې نرګس محمدي د درې اوونیو په مخه له زندانه کور ته استول شوې ده.
یوې سرچینې د ازادې راډیو فردا څانګې ته وویل، مېرمن محمدي نن د درملنې لپاره له زندانه خوشې شوې ده.
د نرګس محمدي مدافع وکیل مصطفی نیلي په ایکسپاڼه کې لیکلي دي، د دې موکله د ډاکټرانو له وړاندیز او د څارنوالانو له موافقې وروسته د درې اوونیو په مخه ازاده شوې ده.
په وروستیو اوونیو کې د نرګس محمدي د روغتیا په اړه بېلابېل راپورونه خپاره شول، په یوه راپور کې دا هم وویل شول چې دا د هډوکي په سرطان اخته شوې ده.
د بشري حقونو بنسټونو او ډلو بیا بیا له زندانه د مېرمن محمدي د ازادېدو غوښتنه کړې ده.
د ناټو سرمنشي: د اوکراين زېربناو ساتلو ته لومړيتوب ورکوو
د ناټو سرمنشي مارک نن وویل چې، د ناټو تړون ټولو غړیو موافقه وکړه، دې ته به ډېر لومړیتوب ورکړي چې د اوکراین زېربناوې وساتي.
مارک روټه په بروکسل کې د ناټو د دوه دېرش غړیو هېوادو د بهرنیو چارو د وزیرانو د غونډې د دوهمې ورځې تر پیل مخکې خبریالانو ته وویل، غړیو هېوادو تېره شپه پر دې خبرې وکړې، چې اوکراین ته به کافي دافع هوا سیستم چمتو کوي، ترڅو پر خپلو زېربنایي تاسیساتو د روسیې د بریدونو مخه ونیسي.
دا موافقه پهداسې وخت کې شوې ده چې، روسیه له درېیو کلونو راهیسې د ژمي په درشل او د ژمي په ورځو شپو کې د اوکراین د انرژي تاسیسات په نښه کوي.
د بشري حقونو څار ډله: سوریایي یاغیان د حماه تر نږدې څنډو رسېدلي
د سوریې د بشري حقونو د څار ډله وایي، سوریایي یاغیان د حماه مهم ښار تر نږدې څنډو رسېدلي او د دوی د جګړو له امله ګڼ خلک بېځایه شوي دي.
د اسلامپالو په مشرۍ دغه یاغیان د سوریې د څلورم لوی ښار په لور په سرعت مخته شوي او د سوریې یو شمېر شمالي برخې یې نیولي چې په دغه هېواد کې یې له څلورو کلونو راهیسې نسبي چوپتیا ماته کړې ده.
د سوریې د بشري حقونو د څار ډلې تېره شپه وویل چې یاغیان اوس د حماه ښار دروازو ته رسېدلي او د ښار په ځینو سیمو یې ډزې کړي دي.
د سوریې د بشري حقونو د څار ډله چې په بریتانیا کې مېشته ده، زیاتوي چې د حماه ښار شاوخوا د جګړې له امله ګڼ کسان د خپلو کورونو پرېښودو ته مجبوره شوي دي.
د نړۍ په جګړه ځپلو سیمو کې له خلکو سره د مرستې لپاره د ۴۷ میلیارد ډالره بسپنې غوښتنه شوې
ملګرو ملتونو د نړۍ په جګړه ځپلو سیمو کې له خلکو سره د مرستې لپاره له مرستندویو هېوادونو څخه د ۴۷ میلیارد ډالره بسپنې غوښتنه کړې.
د ملګرو ملتونو د مرستو د څانګې مشر ټام فلیتچر پرون په ژنیو کې خبریالانو ته وویل، دې پیسو ته په راروان ۲۰۲۵م کال کې د نړۍ له هغو ۱۹۰ میلیون وګړو سره د مرستې لپاره اړتیا ده چې له جګړو څخه تښتېدلي او له لوږې سره لاس ګرېوان دي.
د فلیتچر په وینا ملګرو ملتونو له هغو پیسو څخه چې په روان کال کې یې له مرستندویو هېوادونو څخه غوښتې وې حتی نیمايي برخه لا نه دي ترلاسه کړي.
د ملګرو ملتونو چارواکي وېرېږي چې د امریکا په ګډون لوېدیځ هېوادونه له ملګرو ملتونو سره خپلې بسپنې بندې نه کړي.
فلیتچر په نړۍ کې روان کړکېچونه بېساري وبلل او هیله یې وښوده چې سږ کال به ملګري ملتونه د سوډان، سوریې، د غزې د تړانګې او سوریه په ګډون چې جګړو ځپلي، د ۳۲ هېوادونو له اړو خلکو سره مرسته وکړي.
په ګرجستان کې د معترضانو د خورولو لپاره له اوښکې بهوونکي ګاز څخه کار اخیستل شوی
د ګرجستان په پلازمېنه تبلیسي کې د مظاهرو ضد پولیسو د شپږمې پرلهپسې شپې په مخه بېګا د معترضانو د خورولو لپاره له اوښکې بهوونکي ګاز او د اوبو شیندلو له ماشینونو کار واخیست.
په سیمهییز وخت د شپې په ۱۱:۳۰ بجو پولیسو هڅه وکړه چې معترضان د پارلمان د وانۍ له مخې لیرې کړي، خو یو شمېر مظاهره چیانو د اوبو پر وړاندې نڅا کوله او ځینو نورو ځانونو تر چتریو لاندې پټ کړي وو.
له دې مخکې د کورنیو چارو وزارت ویلي وو چې د معترضانو په لیکو کې تندلارو کسانو د تاوتریخوالي غیرقانوني اقدامات پیل کړي دي.
په ګرجستان کې روانې مظاهرې تر ۲۰۲۸ کاله په اروپايي ټولنه کې د ګرجستان د غړیتوب د اړوندو مذاکراتو د ځنډولو لپاره د حکومت د طرحې په مخالفت کې پیل شوي.
د ګرجستان صدراعظم ایراکلي کوبا خیدزې د خپلې استعفا غوښتنې رد کړي او ګواښ یې کړی چې خپل سیاسي مخالفان به وځپي.
پوتین او اردوغان: د سوریې په شمال کې د روان کړکېچ د هواري لپاره ډیپلوماسۍ ته اړتیا ده
د روسیې او ترکیې ولسمشرانو، ولادمیر پوتین او رجب طیب اردوغان ټینګار وکړ چې د سوریې په شمال کې د روان کړکېچ د هواري لپاره ډیپلوماسۍ ته اړتیا ده.
دواړو ولسمشرانو پرون سې شنبې پرټیلفون خبرې وکړې.
د اردوغان له دفتره پرون سې شنبې په خپره شوې اعلامیه کې غوښتنه شوې چې سوریه باید د پراخې بې ثباتۍ یوه سرچینه نهشي.
د دغې اعلامیې له مخې چې د ترکیې د ولسمشرۍ دفتر په خپله ایکس پاڼه کې خپره کړې، اردوغان له پوتین سره په خبرو کې ټینګار کړی چې ترکیه د دې ترڅنګ چې د سوریې د ځمکنۍ بشپړتیا ملاتړ ته دوام ورکوي، په دې هېواد کې د یوې عادلانه او دایمي حل لارې لپاره هم هڅې کوي.
اردوغان همدارنګه ژمنه کړې چې ترکیه به د کردستان د کارګرانو ګوند، پيکېکې چې ترکیې او متحدوایالتونو هغه یو تروریستي سازمان نومولی، په وړاندې مبارزې ته دوام ورکړي.
د هغه په خبره، دا ګوند هڅه کوي چې په سوریه کې له رامنځته شوي وضعیت څخه د ځان په ګټه کار واخلي.
د ترکیې او روسیې ولسمشران وروسته له هغې په خپلو کې خبرې کوي چې د سوریې یاغیانو تېره اوونۍ په حلب کې د سوریې د رژیم پرځواکونو په حملو سره هغوی له ډېرو سیمو په شا کړل او پر هغو یې خپله ولکه ټینګه کړه.
له هغې راهیسې روسیې د دمشق په ملاتړ د یاغیانو پر مورچلو بریدونو ته زور ورکړی دی.
اوکراین یوځل بیا په ناټو کې د بشپړ غړیتوب پر غوښتنه ټینګار کړی
اوکراین یوځل بیا په ناټو کې د بشپړ غړیتوب پر غوښتنه ټینګار کړی او وايي چې یوازې د ناټو بشپړ غړیتوب د دې هېواد د راتلونکي امنیت ضمانت کولای شي.
د اوکراین د بهرنیو چارو وزیر اندرې سیبیها دا څرګندونې په بروکسل کې د ناټو د غړو هېوادونو د بهرنیو چارو د وزیرانو د نننۍ غونډې په درشل کې په یوه بیان کې وکړې او زیاته یې کړه، دی پوره باور لري چې یوازې په دې توګه پر اوکراین او نورو هېوادونو د روسیې د یرغل مخنیوی او د دې هېوادونو د امنیت رښتینی ضمانت کېدای شي.
د سیبیها د دې غوښتنې په ځواب کې د کریملین ویاند دیمیتري پیسکوف وویل چې په اوکراین کې د ناټو غړیتوب د منلو وړ نه دی او دا به د ده په وینا د روسیې لپاره یو ګواښ وي.
د اوکراین ولسمشر ولودیمیر زیلینسکي هم څو ورځې مخکې ویلي و چې په ناټو کې د اوکراین غړیتوب به هغه څه چې ده د جګړې تود پړاو وباله پای ته ورسوي.
روسیې د ۲۰۲۲م کال په فبروري میاشت کې پر اوکراین غیرموجه یرغل وکړ چې تراوسه هم دوام لري.