په کندهار کې د طالبانو د حکومت د کابینې غونډه شوې ده.
د طالبانو مشر ملاهبتالله اخندزاده د خپل حکومت سرپرسته کابینه کندهار ته ورغوښتې او هلته یې د کابینې د عمومي غونډې تر څنګ له دوی سره بېلابېلې ناستې کړي دي.
دا غونډه چې مخکې به په کابل کې د ریاست الوزرا او یا هم مرستیالانو په مشرۍ یې جوړېده، ویل کېږي چې په دې ورستیو کې د طالبانو د مشر په مشرۍ په کندهار کې جوړېږي.
په کندهار ولایت کې له موضوع ځینو باخبرو سرچینو د سهشنبې په ورځ ازادي رادیو ته وویل چې دا غونډې د روانې اوونۍ په لومړیو درېیو ورځو کې شوي چې په کې په بېلابېلو موضوعاتو لکه "د امر بالمعروف د نوي قانون په سر خبرې، خپلمنځي ناندرې، غوښتني او ګېلې" په کې شاملې وې.
دغو سرچینو ازادي راډیو ته هغه لېست هم رااستولی چې د کابینې په ناستې کې د ادلون بدلون په اړه پرېکړه شوې ده.
ازادي راډیو ته د دې لېست تر رسېدو وروسته د طالبانو د حکومت ویاند ذبیحالله مجاهد هم پر خپله ایکسپاڼه خپور کړ، خو نه یې دي ویلي چې څه وخت او چېرې یې دا ګمارنې شوي دي.
کندهار ولایت کې ځینو خبریالانو هم ازادي راډیو ته د یادو ناستو جوړېدل تاييد کړي، خو دوی ویلي چې یادو ناستو رسنۍ نه وې بلل شوې او د دوی په خبره په "مخفي" توګه ترسره شوي چې آن دوی یې په اړه د راپور ورکولو اجازه نه لري.
د طالبانو د حکومت ویاند ذبیحالله مجاهد کې او په کندهار کې د دوی د حکومت د والي ویاند محمود عزام او د اطلاعاتو او کلتور رییس انعامالله سمنګاني په دې اړه د ازادي راډیو پرلهپسې اړیکې او پوښتنې ځواب نه کړې.
د یادونې ده چې په دې وروستیو کې د ګڼو نورو ولایتونو په ګډون په کندهار کې په کندهار کې هم پر رسنیو د ذی روحو یا ژوندیو موجوداتو د فلم او تصویر خپرېدو د بندیز له امله دا ډول مهمې ناستې چې د طالبانو د حکومت مشران او وزیران په کې برخه اخلي، د رسنیو له پوښښه پاتې کېږي.
خو د طالبانو مشر ملاهبت الله اخندزاده له دې بندیز مخکې هم، هېڅ وخت د رسنیو په وړاندې نه دی ظاهر شوی.
