ملګرو ملتونو په منځني ختیځ کې د جګړې د پراخېدو د احتمال له کبله وېره او اندېښنه ښودلې ده.
د اسراییل پوځ پرون وویل، د لبنان د پلازمېنې بیروت د جنوب پر ضاحیه سیمې په هوايي برید کې یې د حزبالله مهم قوماندان ابراهیم عقیل وژلی دی.
د لبنان روغتیايي چارواکو ویلي چې په دې برید کې دولس کسان وژل شوي او لسګونه نور ټپیان دي.
د اسراییلو صدراعظم بنیامین نتنیاهو د پرونۍ حملې د څرنګوالي په اړه په یوه لنډ بیان کې چې اسراییلي رسنیو خپور کړ ویلي چې د حزبالله د جګپوړو قوماندانانو وژنو وښودله چې د اسراییلو هدف واضح دی.
د اسراییلو د پوځ ویاند دانیل هګاري وویل د اسراییلو په برید کې د ایران پلوې حزبالله د پوځي څانګې مهم مشر ابراهیم عقیل چې د رضوان په نوم د ځانګړي ځواک سرپرستي یې کوله د دې ډلې له لسو نورو مهمو قوماندانانو سره یوځای وژل شوی دی.
د اسراییل او حزبالله ترمنځ د ۲۰۰۶م کال له خونړۍ جګړې وروسته پرونی برید پر بیروت د اسراییلو تر ټولو خونړی برید بلل کېږي.
هګاري وویل چې دا حمله د اسراییلو د خوندیتوب لپاره شوې ده.
هغه عقیل پر اسراییلو د منظمو راکټي حملو مسوول وباله.
د امریکا د بهرنیو چارو وزارت تېرکال د هغو معلوماتو په بدل کې چې د عقیل له نیولو یا د هغه د استوګنې د ځای له افشا کولو سره مرسته وکړي اوه میلیون ډالره جایزه اعلان کړې وه.
ابراهیم عقیل د حزبالله د پوځي برخې جګپوړی غړی و چې د امریکا بندیزونه هم پرې لګېدلي وو.
متحدوایالتونو نوموړی تورن کړی و چې په ۱۹۸۳ کال کې په بیروت کې د امریکا پر سفارت او دوو پوځي اډو په برید کې یې هم لاس درلود.
په دې حملو کې له ۳۰۰ ډېر کسان وژل شوي وو.
پر عقیل د امریکا له لوري دا تور هم و چې په ۱۹۸۰مه لسیزه کې په جرمني کې د امریکايي وګړو په برمته کولو کې یې لاس درلود.
پرون د اسراییلو له حملې مخکې حزبالله د اسراییل پر شمال۱۴۰ توغندي وویشتل او له هغه یوه ورځ مخکې د پېجرونو په چاودنو کې د حزبالله له شلو ډېر غړي مړه او سلګونه نور ټپیان شول.
حزبالله وايي چې دا حمله اسراییلو کړې وه.
ملګرو ملتونو د حزبالله او اسراییلو له حملو وروسته په منځني ختیځ کې د جګړو د پراخېدو د احتمال له کبله اندېښنه ښودلې ده.
د ملګرو ملتونو ویاند سټیفان دوجاریک پرون په نیویارک کې خبریالانو ته وویل چې سرمنشي انټونیو ګوټېرېش له دې کبله ډېره اندېښنه لري او د جګړې له ښکېلو خواوو غواړي چې له زغم او خورا زیات صبر څخه کار واخلي.
